Këtë vit, pjesëmarrja e policëve në shërbimin shëndetësor është rritur me 150 për qind.
Kjo u bë e ditur në konferencën e përbashkët për media të Policisë së Kosovës dhe Shërbimit të Shëndetit Shëndetësor dhe Klinik të Kosovës (SHSKUK), ku u prezantuan arritjet e “Marrëveshjes së Bashkëpunimit në mes të PK-së dhe SHSKUK-së për Shërbime Mjekësore dhe Psikologjike të Personelit Policor dhe Rekrutëve”.
Drejtori i QKUK-së, Osman Hajdari, ka theksuar se kjo marrëveshje ka sjellë një rritje të konsiderueshme të numrit të policëve që përfitojnë shërbime mjekësore dhe psikologjike.
“Ajo që është më e veçanta e këtij viti për 150 për qind kemi shtim të pjesëtarëve policorë në shërbimin shëndetësor. Pavarësisht angazhimit si menaxhment falënderoj secilin pjesëtarë për shërbimet që kanë bërë. Me të gjitha organet që kemi bashkëpunim të jenë në gatishmëri për të ofruar këto shërbime edhe në vitet vijuese”, ka thënë Hajdari.
Nga ana tjetër, drejtorja e Shërbimeve Shëndetësore në Policinë e Kosovës, Lindita Kajtazi, ka theksuar rëndësinë e ofrimit të shërbimeve mjekësore për të gjithë pjesëtarët e Policisë së Kosovës, duke theksuar ndikimin e këtyre shërbimeve në mirëqenien e tyre shëndetësore.
“Përveç kontrollimit mjekësor sistematik kemi arritur të realizojmë kontrollimet mjekësore psikologjike për të gjithë aplikantët që kanë konkurruar në Policinë e Kosovës. Janë kryer dhe ekzaminime të zyrtarëve dhe kjo ka ndikuar të bëjmë një identifikim të hershëm të sëmundjeve. E gjithë kjo është arritur falë përkushtimit të përbashkët me një punë të madhe profesionale duke respektuat kodin e etikës.”, ka theksuar Kajtazi, transmeton EO.