Sot shënohet 23-vjetori i sulmit terrorist ndaj Shteteve të Bashkuara, një ngjarje që tronditi botën dhe ndryshoi rrjedhën e historisë moderne.
Më 11 shtator 2001, një grup prej 19 terroristësh radikalë, të lidhur me organizatën Al-Qaeda, realizuan katër sulme të koordinuara, të cilat përfshinin rrëmbimin e katër aeroplanëve komercialë amerikanë.
Sulmet filluan në orën 8:46 të mëngjesit kur aeroplani i parë, American Airlines Flight 11, u përplas në kullën veriore të Qendrës Botërore të Tregtisë (WTC) në New York. Ky akt çoi në një shpërthim të fuqishëm që krijoi një çarje masive në ndërtesë, duke lënë të bllokuar qindra njerëz në katet e sipërme. Vetëm 17 minuta më vonë, në orën 9:03, një tjetër aeroplan i rrëmbyer, United Airlines Flight 175, u përplas në kullën jugore, duke e kthyer skenën në një makth të papërshkrueshëm.
Të dy kullat ranë brenda një ore e gjysmë nga përplasja e parë, duke shkaktuar një kolaps të plotë të ndërtesave. Shumë prej viktimave u përpoqën të shpëtojnë, ndërsa zjarrfikësit dhe policia luftonin me flakët dhe rrënojat për të shpëtuar sa më shumë jetë që të ishte e mundur. Në total, më shumë se 2,750 njerëz humbën jetën vetëm në New York, përfshirë 343 zjarrfikës dhe 60 policë.
Në New York dhe Uashington, sot do të mbahen ceremoni përkujtimore, të cilat do të fillojnë me një minutë heshtjeje në kohën kur ndodhën sulmet.
Përveç sulmeve në Kullat Binjake, dy aeroplanë të tjerë të rrëmbyer synuan objektiva të tjera kyçe në Shtetet e Bashkuara. American Airlines Flight 77 u përplas në Pentagon, duke shkaktuar vdekjen e 184 personave.
Ndërkohë, pasagjerët dhe ekuipazhi i United Airlines Flight 93, pasi morën vesh për sulmet e mëparshme, u përpoqën të rimarrin kontrollin e avionit nga rrëmbyesit. Aeroplani u rrëzua në një fushë në Pensilvani, duke vrarë të gjithë 40 personat në bord, por duke shmangur një katastrofë të mundshme në Uashington, D.C.
Pas këtyre sulmeve, SHBA-ja nisi një fushatë të gjerë të njohur si “Lufta kundër Terrorit”, e cila përfshinte ndërhyrjet ushtarake në Afganistan dhe Irak, me qëllimin për të çrrënjosur Al-Qaeda dhe rrjetet e tjera terroriste.