Deputetja nga Aleanca për Ardhmërinë e Kosovës (AAK), Time Kadrijaj, ka folur për planin franko-gjerman, për të cilin, ka thënë se ai ka disa nene, në të cilat ka elemente të shtetësisë.
“Meqenëse është një draft, këtu është lënë mundësia e negocimit në mes të palëve, por kryeministri Albin Kurti duhet të diskutojë dhe t’i qartësojë gjërat”, ka deklaruar Kadrijaj.
Ajo ka thënë se liderit të AAK-së nuk ia ka dhënë as një kopje të draftit, por është diskutuar ajo çfarë ka treguar Ramush Haradinaj në zyrat e AAK-së.
“Kopje të [planit franko-gjerman] kësaj draft-marrëveshjeje nuk ka pasur as Haradinaj, por ne e kemi diskutuar se ka elemente të shtetësisë, dhe për paqartësitë kemi ngritur nevojën që duhet të diskutohet edhe me aleatët e Kosovës në mënyrë që të marrim garanci nga ta”, ka shtuar ajo.
Sipas saj, AAK-ja për marrëveshjen finale në mes të Kosovës dhe Serbisë ka kritere që të ketë parime të qarta.
“Duhet të respektohet sovraniteti dhe integriteti territorial i Kosovës, duhet të respektohet Kushtetua e Kosovës dhe organizimi i brendshëm dhe në fund duhet të jetë njohja reciproke”, ka deklaruar ajo, në emisionin “FIVE” në RTV Dukagjini.