Presidenti i Ukrainës, Volodymyr Zelensky, ka akuzuar Kremlinin se po i drejtohet “terrorizmit energjetik”, me ndërprerjet e energjisë elektrike.
Zelensky ka thënë se 4.5 milionë njerëz ishin pa energji elektrike pas sulmeve ruse në rrjetin energjetik.
“Sonte, rreth 4.5 milionë konsumatorë janë shkëputur përkohësisht nga konsumi i energjisë“, ka thënë Zelensky, president ukrainas.
Zelensky ka shtuar se sulmimi i infrastrukturës energjetike nga Rusia është një shenjë “dobësie”, pasi forcat ruse nuk arrijnë të bëjnë shumë terren në vijën e frontit.
Në javët e fundit, Rusia ka kryer sulme në shkallë të gjerë me raketa dhe drone në objektet e energjisë ukrainase.
Sulmet kanë ardhur pasi zyrtarët kanë thënë se trupat ruse ka mundësi të tërhiqen nga qyteti jugor Kherson, shkruan BBC-ja.
Kësisoj, pas disa humbjeve, Rusia ka shtuar javët e fundit sulmet ndaj infrastrukturës së energjisë elektrike në qytetet larg vijave të frontit.
Madje, siç bën të ditur BBC, vetëm në javët e fundit, një e treta e termocentraleve të vendit është shkatërruar.
Dhe pas këtij shkatërrimi, qeveria ukrainase është detyruar të nxisë popullin të përpiqet të përdorë me kursim energjinë elektrike.