Katër raste të dhunës në familje janë raportuar përgjatë të dielës, bën të ditur Policia e Kosovës.
Raporti 24-orësh i Policisë së Kosovës bën të ditur se dy nga rastet kanë ndodhur në komunën e Lipjanit, një në atë të Prishtinës dhe një në Obiliq.
Është arrestuar i dyshuari mashkull kosovar për shkak se pas një mosmarrëveshjeje kishte sulmuar fizikisht babain dhe vëllain e tij, të shtunën në Lipjan. Me vendim të prokurorit i dyshuari pas intervistimit është dërguar në mbajtje.
Mirëpo, ky nuk është rasti i vetëm i dhunës në familje në komunën e Lipjanit përgjatë të shtunës.
Rreth orës 19:55, ankuesja kosovare ka njoftuar policinë se pas një mosmarrëveshjeje, bashkëshorti i saj kosovar ka ushtruar dhunë psikike ndaj saj. Të dyja palët janë liruar në procedurë të rregullt pas intervistimit dhe inicimit të rastit.
Ndërkaq në Prishtinë, ankuesja kosovare ka njoftuar policinë se është shqetësuar dhe kanosur nga bashkëshorti i saj, për të cilin viktima ka thënë se është përdorues i substancave narkotike. I dyshuari gjendet në arrati, ndërsa lidhur me rastin është njoftuar prokurori dhe mbrojtësi i viktimave.
Pasi kishte sulmuar fizikisht anëtarët e familjes, është arrestuar i dyshuari mashkull kosovar, në Obiliq. Për të dyshuarin, familjarët kanë thënë se vuan nga probleme shëndetësore mendore. Me vendim të prokurorit, pas inicimit të rastit i dyshuari është dërguar në neuropsikiatri.