Shefi i politikës së jashtme të BE-së, Joseph Borrell ka thënë se një sulm bërthamor rus kundër Ukrainës do të shkaktonte “një përgjigje kaq të fuqishme” nga Perëndimi, saqë ushtria ruse do të “asgjësohej”. Komentet e Borrell-it vijnë pas retorikës gjithnjë e më luftarake të presidentit rus, Vladimir Putin.
Pas nënshkrimit të një dekreti të pjesshëm mobilizimi për të rritur gradat e ushtrisë ruse më 21 shtator, Putin ka paraljmëruar NATO-n se vendi i tij kishte “mjete të ndryshme shkatërrimi” në dispozicion për të mbrojtur “integritetin e saj territorial”. Lideri rus kishte shtuar se “Nuk është një bllof”, ndërsa Borrell ka thënë se “ai nuk mund të përballojë bllofin”.
“Dhe çdo sulm bërthamor kundër Ukrainës do të krijojë një përgjigje jo një përgjigje bërthamore, por një përgjigje kaq të fuqishme nga pala ushtarake që ushtria ruse do të asgjësohet dhe Putini nuk duhet të bëjë bllof”, ka thënë Borrell.
Shefi i politikës së jashtme ka folur për një “moment serioz të historisë” dhe ka pikturuar një pamje të zymtë të pasigurisë dhe paqëndrueshmërisë së thellë për politikën globale si rezultat i pushtimit të Rusisë. Ai shtoi se sistemi aktual i bazuar në rregulla po “sfidohej si kurrë më parë”.
“Kjo luftë po ndryshon shumë gjëra, dhe sigurisht po ndryshon Bashkimin Evropian. Kjo luftë do të krijojë një Bashkimi Evropian të ndryshëm, nga perspektiva të ndryshme”, tha tutje Borrell. Ai e ka përshkruar Evropën si një “kopsht” të lirisë politike dhe prosperitetit ekonomik, por ka shtuar se pjesa tjetër e botës ishte kryesisht një “xhungël”, raporton euronews.
“Xhungla mund të pushtojë kopshtin. Kopshtarët duhet të kujdesen për të, por ata nuk do ta mbrojnë kopshtin duke ndërtuar mure. Një kopsht i bukur i vogël i rrethuar me mure të larta për të parandaluar hyrjen e xhunglës nuk do të jetë një Për shkak se xhungla ka një kapacitet të fortë rritjeje dhe muri nuk do të jetë kurrë aq i lartë sa për të mbrojtur kopshtin”, tha ai.
“Kopshtarët duhet të shkojnë në xhungël. Evropianët duhet të jenë shumë më të angazhuar me pjesën tjetër të botës.”
I pyetur në lidhje me komentet e Borrelit për asgjësimin bërthamor, një zëdhënës i Komisionit Evropian tha se një sulm bërthamor rus kundër Ukrainës do të ishte një “ndryshues total i lojës” dhe se vendet e BE-së po përgatiteshin për çdo skenar të mundshëm.