Sipas raportimeve të mediave amerikane, reperi Takeoff, nga grupi i muzikës rep Migos, është qëlluar dhe vrarë në Hjuston të Teksasit.
Policia i tha revistës Variety se reperi u vra në një qendër të bowling ku po luante zare me xhaxhain dhe shokun e tij të grupit, Quavo, të martën në mëngjes.
Reperi në fjalë, emri i vërtetë i të cilit ishte Kirshnik Khari Ball, ishte 28 vjeç.
Migo-t ishin një nga grupet më me ndikim të brezit të tyre, duke krijuar një stil të repimit në trinjakë të zhurmshëm, stakato, të njohur si “Migos flow”.
Grupi, i cili u nda në fillim të këtij viti, shënoi disa hite ndërkombëtare duke përfshirë Bad and Boujee, Versace dhe Walk It Talk It.
Të shtënat ndodhën rreth orës 02:30 me kohën lokale (07:30 GMT) në një ballkon jashtë 810 Billiards and Bowling Alley në Hjuston, shkruan BBC.
Policia ka bërë të ditur se 40 deri në 50 të ftuar kishin qenë në një festë private në vend, kur dikush filloi të qëllonte me armë. Rojet e sigurisë në zonë dëgjuan të shtënat, por nuk panë se kush hapi zjarr.
Kur mbërritën, oficerët thanë se gjetën një turmë të madhe dhe një burrë me një plagë me armë zjarri në kokë ose qafë. Ai u shpall i vdekur në vendngjarje.
Policia thotë se po studion pamjet e ngjarjes nga kamerat e sigurisë dhe po i bën apel publikut për informacion.
Takeoff më herët kishte postuar në Instagram foto të tij në sallën e bowlingut. Fotografitë e skenës së krimit të shpërndara në mediat sociale dukeshin se tregonin një burrë të veshur me rroba të ngjashme të shtrirë në tokë.
Raportet se Quavo u plagos gjithashtu në incident nuk janë konfirmuar. Policia ka thënë se dy viktima të tjera u dërguan në spital me automjete private.