Heshtja ka kapluar gjithë qendrën për përkujdesje ndaj të moshuarve “Orenda” në Pejë. Të gjithë banorët e kësaj qendre tashmë janë larguar nga aty, pas vendimit të Ministrisë së Financave, për revokim të licencës, për shkak të sulmit ndaj një të moshuare nga disa infermiere, që ishin duke punuar këtu.
Pronari i kësaj qendre Anton Rasaj, duke mos dashur të flasë para kamerës ka konfirmuar se tashmë të gjithë banorët e kësaj qendre janë larguar nga këtu dhe se licenca i është dorëzuar institucioneve.
Ai ka potencuar se do të ndjekë të gjitha rrugët ligjore për këtë
Rasaj ka paralajmëruar se do t’i drejtohet Gjykatës së Arbitrazhit për shkak se cilëson se i është bërë e padrejtë.
Por, në këtë qendër sipas inspektoratit të Ministrisë së Shëndetësisë, kanë qenë të punësuar vetëm 9 persona.
“Është konstatuar se në këtë qendër janë të punësuar 4 profesionistë shëndetësor, të tipit infermierë, dhe është verifikuar nëse këta infermierë kanë licencë pune, dhe rezulton se 4 infermierët në fjalë kanë licencë pune…Në bazë të informatave që ne kemi nuk ka pasur profesionistë të tjerë shëndetësor”, ka thënë kryeinspektori shëndetësor, Shaban Osmani.
Për atë se çfarë ka ndodhur me të punësuarit e tjerë dhe të moshuarit që kanë qenë duke qëndruar këtu, nuk kanë informacione nga komuna e Pejës. Ata thonë se nuk kanë kompetenca për monitorim të kësaj qendre, derisa kanë thënë se janë të hapur për të ndihmuar ministritë përgjegjëse.
“Një prej pikave apo arsyeve që ka marr ai, është se ka pasur të punsojë 20 deri në 25 persona, tash çka bëhet me ata persona, me ata të punësuar aty me të thënë të drejtën unë nuk e kam idenë. Më vjen keq për vendin e tyre të punës, por besoj që tash inspektorati, policia, prokuroria janë duke u marr me këtë punë dhe e rregullojnë si është më së miri, sepse edhe ata që kanë qenë duke qëndruar aty duhet të bëhet një zgjidhje, por nëse hapet procedura të tjera ne jemi të hapur”, ka thënë zëdhënësi i komunës së Pejës, Faik Zekaj.
RTV Dukagjini, ka pyetur Ministrinë e Financave, në lidhje me të gjeturat në këtë qendër dhe se nëse kanë pranuar licencën nga pronari, por ata nuk kanë kthyer përgjigje gjatë ditës.
Ndërkohë që avokati, i Aurona Pelajt, e cila gjendet në paraburgim bashkë me 2 infermiere të tjera, ka thënë se kanë dorëzuar ankesë në Gjykatën e Apelit, duke kundërshtuar këtë masë të sigurisë.