Përmbytjet që shkaktuan shirat e furishëm të dielën e të hënën, dëmtuan shtëpi, biznese, kultura bujqësore dhe rrugë në disa komuna të Kosovës.
Kështu shkolla e mesme e mjekësisë “Hysni Zajmi” në Gjakovë është mbuluar nga uji.
Reshjet e mëdha të shiut kanë depërtuar edhe në pjesën e kabineteve të kësaj shkolle ku shihet të jenë dëmtuar dyshemetë e sallave.
FOTO: RTV Dukagjini
Istogu, Peja, Vushtrria dhe Juniku janë ndër komunat më të prekura nga reshjet e shiut dhe zyrtarë të institucioneve atje kanë nisur tashmë të bëjnë vlerësimin dhe sanimin e dëmeve.
Komuna e Istogut ka njoftuar se të hënën e 21 nëntorit në këtë qytet nuk do të mbahet mësimi si shkak i vërshimeve të së dielës.
Shkolla në të cilat nuk është mbajtur mësimi ishin, Gjimnazi “Haxhi Zeka” Istog, SHFMU “Bajram Curri” në Istog, Kopshti i Fëmijëve “Gëzimi Ynë” në Istog dhe SHFMU “Ndre Mjeda” në Rakosh.
“Si pasojë e reshjeve të mëdha të shiut në Istog është vështirësuar qarkullimi dhe për shkak të rrezikut që paraqet kalimi i nxënësve në ato rrugë mësimi nuk do të mbahet”, thuhet në njoftimin e komunës.
Ndërkaq në të gjitha shkollat e tjera mësimi është zhvilluar normalisht.
Gjendja pas vërshimeve në disa qytete tashmë është më e qetë se një ditë më parë.