Kryeministri i Shqipërisë, Edi Rama, ka thënë se procesi i anëtarësimit i Ballkanit Perëndimor në Bashkimin Evropian nuk është një provim që mund ta mashtrosh, dhe sipas tij, rëndësia është rritur për shkak të situatës gjeopolitike, me të cilat, përballet rajoni dhe unioni.
Në një intervistë për Euractiv, Rama ka folur për zgjerimin, tensionet rajonale dhe nevojën për t’i çuar përpara reformat, për të garantuar autenticitetin e procesit të zgjerimit.
“Nuk duhet të harrojmë se procesi i integrimit është një proces individual, i bazuar në merita. Ne duhet të përmbushim standardet e kritereve të detyrave të shtëpisë dhe nuk është një provim që mund të mashtrosh. Edhe nëse profesorët janë shumë të prirur t’ju japin një rrugëdalje. Është në interesin tonë që ta bëjmë këtë provim siç duhet”, është shprehur Rama.
Samiti në Tiranë do të zhvillohet në mes të protestave të drejtuara nga ish-kryeministri Sali Berisha, i cili akuzon qeverinë Rama për korrupsion dhe se nuk po bën asgjë për ta parandaluar emigracionin masiv.
Sa i përket këtij Samiti, Rama ka thënë se fakti që po mbahet jashtë Brukselit dhe në një vend jashtë BE-së, flet shumë për situatën aktuale në Evropë dhe një oreks të ripërtërirë për zgjerim.
“Vetëm fakti që kemi një samit në Tiranë – kush mund ta imagjinonte vetëm pak vite më parë, se BE-ja do të dilte nga perimetri i saj dhe Këshilli do të lëvizte në një vend jashtë BE-së për të pasur një samit. Dhe nuk është thjesht një manifestim, një ngjarje, është më shumë se kaq. Është një angazhim, është një mesazh”, shtoi ai.
Në anën tjetër, Rama ka folur edhe për mbështetjen franko-gjermane.
Rama ka theksuar se mbështetja e Gjermanisë nuk ishte e papritur, pasi Berlini ishte “shumë i përkushtuar për një kohë të gjatë”, kurse qëndrimi i fundit mbështetës i Francës, erdhi si një “befasi”.
“Franca është një surprizë sepse nuk është sjellë kurrë kështu në të kaluarën. Papritmas kuptoi rëndësinë strategjike të rajonit. Dhe kjo është merita e presidentit francez, i cili nga fillimi e deri më sot, ka ndryshuar shumë në kuptimin e këtij rajoni”, ka thënë ai.
Në fillim të këtij viti, presidenti francez, Emmanuel Macron, shprehu idenë e një Komuniteti Politik Evropian (EPG), i cili bashkon shtetet anëtare, vendet kandidate për në BE dhe vendet kandidate. Takimi i parë u zhvillua në fillim të tetorit.