Kryeministri i Kosovës, Albin Kurti, ka pritur në takim Imzot Vincenzo Paglia, kryetar i Akademisë Papnore për Jetën dhe Kancelar i Institutit “Gjon Pali II”, së bashku me Mario Giro, ish-zëvendësministër i Jashtëm i Italisë.
Siç njofton zyra e Kryeministrit të Kosovës, në takim u diskutua për fushat potenciale të bashkëpunimit bilateral ndërmjet Qeverisë së Republikës së Kosovës dhe Selisë së Shenjtë në Vatikan, në fushën e kulturës dhe trashëgimisë kulturore.
Në komunikatën për media thuhet se ndër të tjera u bisedua për të drejtat dhe liritë e qytetarëve, në veçanti liritë fetare dhe trashëgiminë kulturore. U theksua se mbrojtja e tyre sigurohet përmes Kushtetutës së Republikës së Kosovës dhe ligjeve të veçanta.
“U theksua se Kosova është vend demokratik, i ndërtuar mbi bazën e sigurimit të respektimit të drejtave dhe lirive të barabarta për të gjithë qytetarët e saj. Po ashtu, se mbrojtja e trashëgimisë kulturore paraqet një prej prioriteteve programore të Qeverisë së Republikës së Kosovës”, thuhet në komunikatën e zyrës së Kryeministrisë.
Ndër të tjera, në komunikatën e Zyrës së Kryeministrisë është vlerësuar pasuria kulturore e Kosovës dhe tejkalimi i dallimeve mes komuniteteve që jetojnë në Kosovë.
“Në këtë takim u vlerësua pasuria kulturore e vendit tonë, si vlerë universale dhe çelës për krijim të ndërveprimit shoqëror dhe tejkalim të dallimeve ndërmjet komuniteteve të ndryshme që jetojnë në shtetin tonë”, ka përfunduar komunikata e zyrës së Kryeministrisë.