Lideri i Lidhjes Demokratike të Kosovës, Lumir Abdixhiku, e ka kritikuar rëndë kryeministrin Albin Kurti, duke thënë se ai “ka rënë në kurthin e Serbisë”, dhe se “ ai s’mund as të krijojë stabilitet e as të ushtrojë sovranitet në veri”.
Abdixhiku, po ashtu, ka thënë se kryeministrit të vendit i mungon plani për t’u ballafaquar me gjendjen e tensionuar në veri të Kosovës.
“Barrikadat e grupeve kriminale po bëhen tashmë të zakonshme, siç po bëhet i zakonshëm dhe moszëvendësimi i qindra policëve të dorëhequr, prokurorëve, gjyqtarëve e punëtorëve administrativë në veri, që s’ushtrojnë detyrat, pa të cilat shteti nuk ka përfaqësim. Për më tepër, sot Kosova as nuk ka institucione shtetërore në veri e as që mund të organizojë zgjedhje demokratike për t’i zgjedhur këto institucione aty”, ka shkruar Abdixhiku.
Sipas të parit të LDK-së, gjendja në veri është më e rëndë sesa në të kaluarën, teksa ka shtuar se institucionet e Kosovës nuk duhet që gjendjen atje ta normalizojnë.
“Pra jemi në vakum administrativ. Nëse ishte keq e rëndë në veri, sot është dhe më keq e edhe më rëndë se që ishte paraprakisht. Kjo është e vërteta në veri dhe këtë të vërtetë institucionet e Kosovës s’mund ta lejojnë të normalizohet tani”, ka shkruar Abdixhiku.
Abdixhiku ka kërkuar nga Qeveria e Kosovës që të koordinohet me aleatët ndërkombëtarë. Sipas tij, Kosova duhet të kërkojë ndihmë nga ta, për ta kthyer gjendjen në normalitet.
“Qeveria e Kosovës duhet të kërkojë ndihmë. Nga aty të koordinojë çdo hap të ardhshëm me aleatë për të kthyer rendin e ligjin në veri. Sjellja e vonuar, apo e pakoordinuar, është vazhdimësi e tënkes në kurthin e Serbisë”, është shprehur Abdixhiku.
Ndërkohë, gjendja në veri mbetet e tensionuar, derisa po hynë në ditën e dhjetë vendosja e barrikadave nga serbët e asaj ane.
Përvec rrugëve të bllokuara, dhjetra serbë në mesin e të cilëve dyshohet se kishte edhe grupe kriminale nga Rusia, kishin tentuar të hynin në territorin e Kosovës.
Atë nuk e lejoi policia kufitare e Serbisë, derisa në anën e territorit të Kosovës, ishte vendosur një kordon i trupave të KFOR-it, të cilët ishin në gjendje gatishmërie në rast të eskalimit të situatës.
Protesutesit më vonë ishin shpërndarë pa ndonjë incident të madh.