Elon Musk ka thënë të martën se do të largohet nga posti i shefit ekzekutiv të Twitter pasi të gjejë një zëvendësues.
“Do të jap dorëheqjen si CEO sapo të gjej dikë mjaft budalla për të marrë vendin e punës! Pas kësaj, unë thjesht do të drejtoj ekipet e softuerit dhe serverëve”, ka shkruar Musk në Twitter.
Kjo është hera e parë që Musk përmend largimin nga roli i shefit të platformës së mediave sociale, menjëherë pasi përdoruesit e Twitter votuan me vendosmëri në një sondazh që ai të largohej, të cilin miliarderi e nisi vet të dielën në mbrëmje.
Por, nuk është hera e parë që ai thotë se nuk do ta drejtojë kompaninë në një afat të gjatë. Në nëntor, personi i dytë më i pasur në botë i kishte thënë një gjykate në Delaware se ai do të reduktonte kohën e tij në Twitter dhe përfundimisht do të gjente dikë që ta drejtonte atë në vend të tij.
Përdoruesit e Twitterit kanë votuar pro largimit të Elon Muskut nga drejtimi i kësaj platforme.
Kjo pasi ai në një sondazh për 122 milionë ndjekësit e tij, shkroi në Twitter “A duhet të largohem nga posti i kreut… Unë do t’i përmbahem rezultateve…”.
Nga 17 milionë e 502 mijë e 391 përdorues sa kanë marrë pjesë në votim, 57.5 për qind e tyre kanë votuar pro largimit, ndërsa 42.5 për qind, mendojnë se ai duhet të vazhdojë të jetë shef në Twitter.
Musk është përballur me kritika të mëdha pas marrjes së detyrës si pronar i Twitter.
Pas një beteje ligjore, Musk mori kontrollin e kompanisë në tetor, në një marrëveshje prej 44 miliardë dollarësh (36 miliardë dollarë).
Pasi përdoruesit u përgjigjën duke njoftuar planet për t’u larguar në platforma të tjera, Musk zbatoi një politikë të re që ndalon të gjitha lidhjet me rrjetet e tjera sociale, duke përfshirë Mastodon, Instagram dhe Facebook.
Ndryshimi u bë gjatë finales së Kupës së Botës FIFA në Katar, ku Musk u pa i pranishëm me dhëndrin e ish-presidentit amerikan, Donald Trump, Jared Kushner. Deri në fund të ditës, politika ishte braktisur, me Musk duke thënë se të gjitha ndryshimet kryesore të politikave në të ardhmen do të vendoseshin me votim.