Ministri i Punëve të Brendshme, Xhelal Sveçla, ka reaguar ndaj të shtënave të Zubin Potok duke thënë se lojërat e presidentit serb, Aleksandër Vuçiq, vazhdojnë.
Sveçla tha se fillimisht mediat serbe kanë thënë se në Z. Potok ka pasur përleshje të iniciuara nga PK-ja. Kur e kuptuan se sulmuan KFOR-in, duan t’i mohojnë të gjitha sulmet.
Ai kërkoi që barrikadat duhet të hiqen, e duhet të ndalohet organizimi i strukturave ilegale që synojnë destabilizimin e Kosovës.
“Lojërat e Vuçiqit vazhdojnë. Fillimisht kanë thënë se në Z. Potok ka pasur përleshje të iniciuara nga PK-ja. Kur e kuptuan se sulmuan KFOR-in, duan t’i mohojnë të gjitha sulmet. Barrikadat duhet të hiqen. Serbia duhet të ndalojë organizimin e strukturave ilegale kriminale që synojnë të destabilizojnë Kosovën”, ka shkruar Sveçla në Twitter.
Games of Vucic continue. First they said that there were clashes in Z. Potok initiated by KP. When they realised that they attacked KFOR, they want to deny all the attacks. Barricades must be removed. 🇷🇸must stop organising illeg.criminal structures that aim to distabilise 🇽🇰
— Xhelal Sveçla (@XSvecla) December 25, 2022
Gjithashtu, Misioni Paqeruajtës i NATO-s në Kosovë ka konfirmuar se u qëllua me armë zjarri në afërsi të patrullës së saj në Zubin Potok.
Në një përgjigje për Portali Dukagjini nga zyra për informim, thuhet se ngjarja ka ndodhur derisa ushtarët e KFOR-it ishin duke kryer detyrat e tyre.
Nga ky rast, nuk ka të lënduar dhe se po kontrollohen faktet.
“Në këtë moment mund të konfirmoj se para disa orësh një patrullë e KFOR-it, derisa ishte në detyrë në rrethinën e Zubin Potokut, ka dëgjuar dhe parë disa të shtëna afër tij. Të lënduar nuk ka dhe nuk ka dëme materiale. Tani po i kontrollojmë faktet dhe do t’ju përditësojmë”, thuhet në përgjigje.
E nga Policia e Kosovës kanë njoftuar se nuk ka pasur ndonjë sulm ndaj tyre e as ndonjë shkëmbim zjarri në mes policisë apo ndonjë grupi.
Me anë të një komunikate për media, policia ka theksuar se PK-ja nuk ka pasur shkëmbim zjarri ndaj askujt.
“Referuar pyetjeve të shumta adresuar Policisë së Kosovës se, a është sulmuar Policia në Zubin Potok, apo a ka pas shkëmbim të zjarrit mes Policisë dhe grupeve kriminale?, ju informojmë se; Nuk ka pasur ndonjë sulm ndaj Policisë së Kosovës, e as nuk ka pasur ndonjë shkëmbim zjarri mes Policisë së Kosovës, apo ndonjë grupi, PK-ja nuk ka pasur shkëmbim zjarri ndaj askujt”, thuhet në njoftim.