Drejtori për Ballkanin dhe Evropën Qendrore në Këshillin e Sigurisë Kombëtare (NSC), Adi Muzurovic e ka pritur kryetarin e Partisë Demokratike të Kosovës, Memli Krasniqi, në Washington DC.
Në këtë takim, Krasniqi e ka falënderuar Muzurovic për mbështetjen e vazhdueshme të Shteteve të Bashkuara të Amerikës në sigurimin e stabilitetit në Kosovë, duke theksuar se kjo është themeli i fuqizimit të shtetësisë së Kosovës.
“Bashkë diskutuam edhe në lidhje me zhvillimet aktuale politike, posaçërisht për dialogun Kosovë – Serbi. Unë ritheksova edhe një herë qëndrimin e PDK-së për pesë shtyllat që duhet të dalin nga marrëveshja eventuale, të cilat, përveç ruajtjes së karakterit unitar të shtetit sipas rregullimit aktual kushtetutës, përfshijnë edhe njohjen e ndërsjellë mes dy vendeve, si rezultat i domosdoshëm i këtij procesi”, ka shkruar Krasniqi në Facebook.
Krasniqi Ka përfunduar duke thënë se Shtetet e Bashkuara të Amerikës kanë qenë një aleat i besueshëm dhe i pazëvendësueshëm gjatë ngritjes së shtetit të Kosovës, dhe sipas tij fuqizimi i bashkëpunimit dhe koordinimi në këtë periudhë sfidash është më i rëndësishëm se kurrë më parë.