Analisti Ylli Hoxha, ka thënë se në debatin parlamentar për zhvillimet në kuadër të dialogut ndërmjet Kosovës dhe Serbisë, këtë të hënë, është qartësuar se ekziston plani i implementimit të marrëveshjes.
Kështu ka thënë ai në emisionin ”Debat Plus”, në RTV Dukagjini, ku po diskutohet për diskutimet e kryeministrit të Kosovës, Albin Kurti, përballë opozitës lidhur me çështjen e dialogut.
“Sot u qartësuan dy gjëra që ekziston plani i implementimit të marrëveshjes dhe pos kësaj ekziston plani i zbatimit, dhe brenda këtij plani së paku një pikë është që të zbatohet të krijohet statuti i Asociacionit. Këto 2 të reja dolën nga Kurti”, ka thënë Hoxha.
Sipas tij, për planin e zbatimit Kurti thotë se është i negociueshëm por brenga e Hoxhës është që efekti negociator është minimal.
“Do të jetë aq i madh sa ka qenë në dokumentin bazë, i cili ka ndryshuar shumë pak”.
Ai ka theksuar se në këtë debat ishin tri opozita.
“Ku ka sulmuar sot LDK-ja? Kryesisht ka sulmuar në kredibilitetin e Albinit. E dyta ka qenë dëmin që ia ka shkaktuar Kosovës në raportet me raportet ndërkombëtare. Memli Krasniqi ishte i përqendruar në përmbajtje të marrëveshjes, çka sjellë ai plan, kur vjen njohja, si do të bëhet anëtarësimi i Kosovës në organizata ndërkombëtare. Dhe i treti që ka qenë i befasishëm për mua ka qenë pozicioni i AAK-së qe ka qenë përkrahës për planin”, shtoi Hoxha.
Pas mbi tri orë diskutimesh, me kërkesë të opozitës, seanca u shty për një ditë tjetër, për shkak të mungesës së kryeministrit të Kosovës, Albin Kurti, në sallën plenare. Ai u largua nga salla, siç u tha, për shkak të një takimi tjetër që kishte në agjendë.
Në seancën e 13 shkurtit të Kuvendit u tha se Kurti duhet të jetë “i sinqertë dhe transparent” për këtë proces.
Debati parlamentar lidhur me dialogun është iniciuar nga subjekti opozitar, Partia Demokratike e Kosovës, që në kërkesën e shkruar ka thënë se në dy vitet e fundit, dialogu ka hyrë në rrugën që nuk çon drejt marrëveshjes finale.
“Çka është qëllimi i propozimit evropian? A ofron ky propozim mundësinë e marrëveshjes finale? A është ky vazhdim i dialogut apo pikënisje e re? A ka kornizë kohore ky dialog?”, këto ishin disa nga pyetjet e kryetarit të PDK-së, Memli Krasniqi, drejtuar kryeministrit Kurti.
Krasniqi shtroi dhe pyetje tjera, që kryesisht lidheshin me propozimin evropian.
“Cili është teksti i fundit dhe përmbajtja zyrtare e këtij propozimi dhe a e parasheh njohjen e ndërsjellë mes dy vendeve i njëjti? Si dhe, a parashihet vazhdimi i dialogut edhe pas marrëveshjes?”, pyeti ai.
Kurti tha se Qeveria e Kosovës e ka ndërtuar qasjen e saj strategjike përballë dialogut me Serbinë, mbi bazën e dy qëllimeve fillestare.
Qëllimi i parë, siç tha ai, është ndërprerja e praktikës së përfshirjes së çdo çështjeje potencialisht kontestuese ndërmjet palëve, në fushëveprimin e dialogut. Ndërkaq, qëllimi i dytë, sipas tij, është hapja e kapitullit të një procesi të bisedimeve për ndërtimin e raporteve të jashtme të fqinjësisë së mirë dhe parimeve të së drejtës ndërkombëtare si dy shtete të pavarura që e bazojnë marrëdhënien e tyre mbi premisën e njohjes së dyanshme të shtetësisë.
Kryetari i Lidhjes Demokratike të Kosovës, Lumir Abdixhiku, tha se Kurti është kundërthënës në ato që thotë.
“Në njërën anë thotë që ka një draft të dytë, që tha se është dokument merre ose leje, por njëkohësisht e ka pranuar si bazë të mirë. Tani, nuk mund të pranosh si bazë të mirë diçka që është merre ose leje. Ose është bazë përfundimtare, ose është bazë fillestare”, tha ai.
Ai tha se një tjetër kundërthënie është që Kurti, sipas tij, flet që ka rend dhe ligj në katër komunat në veri të Kosovës, por në anën tjetër kërkon “çarmatosjen e veriut dhe dorëzim të armëve”.
Më 2 shkurt, Kurti kishte vendosur gjashtë kushte për themelimin e Asociacionit. Mes tjerash që “strukturat ilegale të Serbisë në veri shuhen dhe bëhet dorëzimi i të gjitha armëve ilegale”.
Abdixhiku tha se shpërputhja më e madhe dhe logjike e Kurtit është “mes refuzimit që provon t’ia bëjë themelimit të Asociacionit dhe pranimit brenda draftit të marrëveshjeve paraprake”.
“Pra, respektimi i marrëveshjeve paraprake është pranim i Asociacionit”, tha ai.
Ai tha se Kurti ka dy rrugë përpara, zhbërjen e Marrëveshjes së Asociacionit, ose implementimin e saj sipas interpretimit të Gjykatës Kushtetuese.