Partitë opozitare kanë kërkuar shtyrjen e seancës, në të cilën do të diskutohej për dialogun Kosovë-Serbi.
Shkak për këtë është mungesa e kryeministrit të Kosovës, Albin Kurti, në Kuvendin e Kosovës.
Se seanca është kërkuar të shtyhet për një gjë të tillë kanë deklaruar në Kuvend shefat e grupeve parlamentare të partive politike LDK, PDK dhe AAK.
Nga Partia Demokratike e Kosovës ka folur shefi i Grupit Parlamentar Abelard Tahiri, i cili është shprehur se në mungesën e kryeministrit të Kosovës, Albin Kurti, seanca e thirrur për sot nuk ka kuptim, pasi do të diskutohej për dialogun Kosovë-Serbi.
“Ne do të duhej të fillonim seancën para 45 minutave, tashmë nuk është prezent kryeministri dhe një debat i tillë që ne si opozitë e kemi ftuar pikërisht që të debatojmë me kryeministrin e Republikës pikërisht për të diskutuar për dialogun Kosovë-Serbi, nuk ka kuptim që të vazhdojmë pa prezencën e kryeministrit sepse i bie të flasim vetë me vete. Ne do të vazhdojmë këtë seancë në momentin kur edhe do të dakordohemi që të jetë edhe kryeministri prezent, sepse nuk ka kuptim të vazhdojmë. Nëse kryeministri mund të jetë aty pas 15 minutave mund të presim, nëse jo po e ndërprejmë dhe e vazhdojmë kur të kemi kushtet dhe dakordohemi edhe me grupet e tjera dhe mazhorancën”, ka thënë Tahiri.
Ndërkaq, nga Lidhja Demokratike e Kosovës (LDK) ka folur shefi i Grupit Parlamentar Arben Gashi, që njashtu ka ndarë mendimin e njëjtë që “debati dhe diskutimi në Kuvend për dialogun nuk ka kuptim nëse kryeministri nuk është aty”.
Ai ka ironizuar me kryeministrin duke thënë se nëse nuk ndihet mirë, mund të presin.
“Nuk ka kuptim që të mbahet debati pa prezencën e kryeministrit. Ky debat dhe diskutimet duhet të bëhen me kryeministrin, nëse ai ka një arsye pse nuk është, duhet të tregojë. Nëse nuk ndihet mirë, mund ta presim derisa t’i kalojë dhe pastaj vazhdojmë”, ka thënë Gashi në Kuvend.
Në anën tjetër, nga AAK ka shprehur mendim të njëjtë edhe shefi i GP të kësaj partie Besnik Tahiri.
“Edhe ne e ndajmë të njëjtin mendim, mendojmë që seanca nuk ka kuptim pa kryeministrin”, u shpreh Tahiri.
Nga Lëvizja Vetëvendosje për gjithë këtë situatë ka folur shefja e GP të kësaj partie, Mimoza Kusari- Lila, e cila ka thënë se kryeministri i Kosovës nuk mund të jetë prezent sepse është në një takim.
Ndërsa, ka theksuar se diskutimi mund të vazhdojë me përfaqësuesit e tjerë të LVV-së.
“Kjo seancë është ftuar nga opozita, ne e kemi mbështetë kërkesën e tyre. Sipas informatës nga zyra e kryeministrit ai është aktualisht në një takim, por që prezencën e tij e ka ofruar zëvendëskryeministri që është përgjegjës për dialogun, për të cilin GP mund të deklarojnë, është seancë që këta e kanë ftuar dhe sipas kërkesës së tyre ne jemi këtu për të debatuar për këtë çështje dhe vazhdojmë të mbesim të një qëndrimi të tillë”, ka deklaruar Kusari-Lila.
Ndryshe, kjo seancë ishte thirrur nga partitë opozitare për të diskutuar lidhur me zhvillimet e fundit rreth çështjes së dialogut Kosovë-Serbi.