Presidentja, Vjosa Osmani, në ditën e 15-vjetorit të Pavarësisë së Kosovës ka mbajtur fjalim në foltoren e Kuvendit të Kosovës.
Osmani nga aty ka kujtuar komandantin historik Adem Jashari dhe ish-presidentin e Kosovës, Ibrahim Rugova.
Osmani gjithashtu ka kujtuar bijtë dhe bijat e UÇK-së që sakrifikuan jetën e tyre për lirinë dhe për mbrojtjen e vendit.
“Ta kujtojmë prijetarin e shtetësisë sonë, Dr Ibrahim Rugovën, i cili e siguroi respektin e botës demokratike, t’i kujtojmë bijtë e bijat tona të cilët të rreshtuar në UÇK sakrifikuan jetën në mbrojtje të vendit. Komandantin historik Adem Jasharin , i cili i priu rezistencës për liri”, ka thënë Osmani. Ndërsa, ka vijuar me kujtime për institucionet e pavarura, ushtarët dhe policët.
“T’i kujtojmë përfaqësuesit e institucioneve të pavarura të Kosovës, të cilët gjatë këtyre 15 viteve kontribuuan për ndërtimin e jetës demokratike në vend, por edhe në paqen e përgjithshme. Të kujtojmë edhe kontributin e ushtarëve dhe policisë sonë, përfshirë ushtarëve të FSK-së, të cilët derisa ne po festojmë ata po luftojnë për shpëtimin e jetëve nën rrënojat e ndërtesave të shembura nga tërmeti tragjik, i cili e goditi Turqinë dhe Sirinë”.
Theks të veçantë kujtimi, Osmani u dha edhe miqve e aleatëve të Kosovës, që siç tha ajo, “edhe kur Kosova është shtypur dhe ka luftuar për lirinë, ata ishin aty dhe edhe sot janë partnerë të besueshëm”.
“I kujtojmë dhe i falënderojmë edhe miqtë tanë, aleatët tanë të cilët i kemi quajtur me të drejtë shpëtimtarë e miq të lirisë, të cilët kanë qenë me ne së bashku përherë. Kur ne ishim të shtypur e luftonim për lirinë, kur u çliruam dhe filluam jetën demokratike në tokën e lirë në vendin e lirë e të dashur tonin, ata janë këtu edhe sot partnerë të besueshëm dhe të qëndrueshëm, me të cilët po e ndërtojmë të ardhmen tonë si partnerë të besueshëm e ndërveprues”, ka vijuar Osmani.
Presidentja Osmani ka thënë se Kosova është zhvilluar në këto 15 vjet dhe ka përgëzuar secilin qytetar për kontributin e dhënë për ndërtim të vendit.
“Më lejoni ta përgëzoj secilin qytetarë për kontributin për ndërtimin e shtetit tonë të përbashkët. Ta kujtojmë sakrificën e pashembullt dhe qëndresën e pashembullt të brezave, e cila i parapriu jetësimit të ëndrrës për liri e demokraci. Në këto 15 vjet Kosova është zhvilluar si shtet i ri, ajo ka dëgjuar kulturë demokratike në funksionim e institucioneve. Këto sfida ndonjëherë na kanë bërë të përplasemi së brendshmi, ngaqë pikëpamjet tona kanë qenë të ndryshme, sikur janë të kuptueshme për shoqëritë demokratike”, u shpreh Osmani.