Forca e Sigurisë së Kosovës (FSK), të premten ka njoftuar se Kompania e Deminimit të Gardës Kombëtare, në kuadër të operacionit për pastrimin e fushëbetejave në “Parkun e Lirisë” në Ferizaj, ka gjetur 1597 municione eksplozive.
Sipas FSK-së, këto mjete shpërthyese janë kryesisht të mbetura nga Lufta e Dytë Botërore.
“Numri i municioneve të gjetura është 1597 që përfshin predha të mortajës dhe artilerisë, të mbetura kryesisht nga Lufta e Dytë Botërore dhe, të cilat, tani janë të sigurta dhe nuk paraqesin rrezik për qytetarët”, thuhet në njoftimin e FSK-së.
Në njoftimin e FSK-së, thuhet se kompania e deminimit do të vazhdojë operacionin deri në pastrimin e plotë të të gjitha fushave të kontaminuara me mina dhe municione shpërthyese.