Sekretari i Përgjithshëm i NATO-s, Jens Stoltenberg, ka paralajmëruar më 8 mars se qyteti i shkatërruar ukrainas, Bakhmut, mund të bjerë në duart e rusëve në ditët në vijim, pasi ky qytet lindor për muaj të tërë është përballur me luftime intensive.
“Ajo çfarë po shohim është se Rusia po dërgon më shumë trupa, më shumë forca dhe Rusia po mundohet që mungesën e kualitetit ta zëvendësojë me kuantitet”, ka thënë Stoltenberg në margjinat e takimit të ministrave të Mbrojtjes të Bashkimit Evropian në Stokholm.
“Ata po pësojnë humbje të mëdha, por në të njëjtën kohë, ne nuk mund ta përjashtojmë mundësinë që Bakhmuti eventualisht të bie në ditët në vijim”, ka shtuar ai.
Kreu i aleancës ushtarake perëndimore, që mbështet Ukrainën, insistoi se “është po ashtu e rëndësishme të theksojmë se kjo jo domosdo do të përbëjë ndonjë pikë kthese në luftë”.
- Zelensky zotohet se do ta forcojë mbrojtjen e Bakhmutit
- Pozicioni rus në Bakhmut është “në rrezik” pa municionin e premtuar nga Moska
- Shefi mercenar rus thotë se Bakhmut është pothuajse plotësisht i rrethuar
“Vetëm vë në pah se ne nuk duhet ta nënvlerësojmë Rusinë. Ne duhet të vazhdojmë t’i ofrojmë mbështetje Ukrainës”, ka thënë ai, raporton France24.
Grupi rus i mercenarëve, Wagner, ka pretenduar të mërkurën se ka marrë nën kontroll pjesën lindore të Bahmutit, ku luftimet mes forcave ruse dhe ukrainase po zhvillohen tash e disa muaj.
Njoftimi erdhi pasi presidenti ukrainas, Volodymyr Zelensky, ka paralajmëruar se nëse Bakhmuti bie, Moska do të fitonte një “rrugë të hapur” për ofensivat e tjera në Ukrainë.
Luftimet përreth Bakhmutit, që gjendet në rajonin e Donjeckut, kanë qenë luftimet më të gjata dhe më të ashprat që kur Rusia nisi pushtimin e Ukrainës më 24 shkurt 2022.
Ekspertët perëndimorë kanë thënë se Bakhmuti ka më pak rëndësi strategjike për Rusinë sesa rëndësi simbolike.