Seanca gjyqësore e Gjykatës Speciale ndaj ish-pjesëtarit të Ushtrisë Çlirimtare të Kosovës (UÇK) Pjetër Shala do të vazhdojë edhe të mërkurën.
Seanca pritet të fillojë nga ora 09:30 dhe do të vazhdojë deri në orën 16:00.
Shala u arrestua më 16 mars 2021 në Belgjikë dhe u transferua në objektin e paraburgimit të Dhomave të Specializuara të Kosovës më 15 prill 2021.
Më 19 prill 2021, Shala pati paraqitjen e tij të parë para gjykatësit të procedurës paraprake dhe u vetëdeklarua i pafajshëm për të gjitha pikat e aktakuzës.
Ndryshe, të martën, avokati i Pjetër Shalës, Jean-Louis Gilissen, kishte njoftuar se Shala është larguar nga gjykatorja e Speciales, ku po zhvillohej çështja ndaj tij, duke thënë se i akuzuari po ndihej në ankth dhe kishte nevojë të qetësohej.
“Zoti Shala heq dorë për të marrë pjesë në këtë gjykim, nuk dëshiron të qëndrojë këtu, pra heq dorë nga e drejta, na kërkon ta përfaqësojmë dhe kërkon të kthehet në paraburgim, sepse duhet të qetësohet, ka nevojë të qetësohet”, kishte thënë avokati.
Sipas mbrojtjes, duke marrë parasysh gjendjen e Shalës ishte vlerësuar se zhvillimet në seancë duhet të ndiqen nga qendra e paraburgimit.
Pjetër Shala largohet nga salla e gjyqit, avokati: Ai është në ankth, po dridhej