Musa Demati, avokati mbrojtës i ish-ministrit të Infrastrukturës, Pal Lekajt, e ka quajtur “të porositur” dhe “tendencioze” aktakuzën e ngritur ndaj klientit të tij, për rastin e 53 milionë eurove.
Kështu ka thënë ai pas seancës fillestare të mbajtur në Gjykatën Themelore në Prishtinë, ku Lekaj është deklaruar i pafajshëm.
“Ndaj sot keni dëgjuar një aktakuzë që s’ka prova, pra është e porositur dhe tendencioze me të cilën ne do të ballafaqohemi dhe do të vërtetojmë pafajësinë e klientit tim”, është shprehur avokati para mediave.
“Ky është rasti më voluminoz financiar në Kosovë. Është rast për të cilin është përfolur shumë por nuk është arritur që të vërtetohet misteri se si i kushtoi buxhetit të Kosovës në tërësi projekti i autostradës me kosto prej 700 milionë eurove”, shtoi ai.
Ndonëse më 20 prill ishte mbajtur seanca fillestare për këtë rast, e njëjta ishte ndërprerë, pasi ish-ministri Pal Lekaj kishte deklaruar se nuk është pajisur me aktakuzë.
Të akuzuar për keqpërdorim të detyrës zyrtare janë, Pal Lekaj, Eset Berisha, Nebih Shatri dhe Besim Tahiri.
Ndryshe, më katër shkurt të këtij viti, për të pandehurit, Prokuroria Speciale kishte ngritur aktakuzë për keqpërdorim të pozitës zyrtare.
Ndaj tyre ishte ngritur aktakuzë për ndarjen e 53 milionë eurove për konsorciumin “Bechtel &Enka”, për ndërtimin e autostradës Prishtinë – Hani i Elezit.
Prokuroria Speciale ka njoftuar se, aktakuza kundër personave të lartcekur është ngritur për shkak të dyshimit, se të pandehurit në bashkëkryerje kanë kryer veprën penale ‘Keqpërdorimi i pozitës apo autoritetit zyrtar”.
Në qershor të vitit 2018, Qeveria Haradinaj kishte ndarë 53 milionë euro shtesë për “Bechtel & Enka” për autostradën e Shkupit.
Por, ish-ministri i Infrastrukturës, Pal Lekaj kishte deklaruar se “për shkak të dështimit të Qeverisë së kaluar që t’i paguajë me rregull faturat, konsorciumi ka kërkuar që, fillimisht, t’i paguajmë 63 milionë euro për shkak të mbajtjes së pajisjeve gjatë dhe shpenzimeve indirekte”.
Në aktin akuzues nga PRSK, thuhet se, të njëjtit, në kundërshtim me Ligjin për Prokurim Publik 04/ L- 042, Statutin dhe Kodin e Sjelljes së KDNM-së dhe me kushtet e kontratës së 1 korrikut 2014, kanë nënshkruar marrëveshje në emër të MI-së si punëdhënës në njërën anë, dhe ndërmarrjes së përbashkët “Bechtel & Enka” si kontraktor në anën tjetër.
Ky veprim, sipas prokurorisë, i ka lënë hapur mundësinë OE “Bechtel & Enka” që më 27 nëntor 2017, të paraqesë pranë punëdhënësit kërkesën për pagesën e shumës shtesë në vlerë prej 63 milionë eurosh, në emër të zgjatjes së afatit të përfundimit të punimeve, kërkesë e cila më pas ka zbritur në vlerën prej 53 milionë e 100 mijë euro.
Si pasojë e këtyre veprimeve të të pandehurve, e njëjta është aprovuar për pagesë nga Qeveria e Kosovës, shumë kjo e cila është në kundërshtim të plotë me opinionin e mbikëqyrësit të kontratës “Hill Internacional”, me ç’rast, si pasojë e veprimeve të të pandehurve, buxhetit të Kosovës, i është shkaktuar dëm në vlerë prej 38 milionë e 321 mijë e 346 euro.
Në pikën e dytë të aktakuzës thuhet se në vazhdimësi nga 27 shtatori 2017 e deri më 5 qershor 2018, në Prishtinë në cilësinë e personave zyrtarë, Lekaj dhe këshilltari i lartë politik i tij, Eset Berisha me dashje dhe në bashkëveprim me njëri-tjetrin, duke i shfrytëzuar pozitat zyrtare, me rastin e zbatimit të projektit “Autostrada Prishtinë-Hani i Elezit R6 “, kanë vepruar në kundërshtim të plotë me rregullat e përcaktuara me Ligjin për Prokurimin Publik, Rregulloren nr.02/2011 të Qeverisë së RKS-së si dhe Statutin dhe Kodin e Sjelljes së Komitetit Drejtues Ndërministror.
Siç thuhet në aktakuzë, Lekaj, pas nënshkrimit të marrëveshjes me OE “Bechtel & Enka” si në pikën e parë të dispozitivit të aktakuzës, në cilësinë e kryesuesit të KDMN-së, pa e informuar dhe pa e marrë pëlqimin e anëtarëve të tjerë, e ka angazhuar Berishën në cilësinë e këshilltarit të tij politik, që të marrë pjesë në negociata me “Bechtel & Enka”.
Kjo me qëllim të përcaktimit të kostos financiare sipas marrëveshjes së 27 shtatorit 2017, detyra këto jashtë fushëveprimit dhe kompetencave të cilat i ka këshilltari politik.
Me këto veprime, të përshkruara në pikën një dhe dy të aktakuzës, PSRK të pandehurit i ngarkon se në bashkëkryerje kanë kryer veprën penale “Keqpërdorimi i pozitës apo autoritetit zyrtar” nga neni 422, par.1 lidhur me nenin 31 të KPRK-së.
Pal Lekaj deklarohet i pafajshëm për rastin e “53 milionëve” të Bechtel Enkas