Kryetari i Lidhjes Demokratike të Kosovës(LDK), Lumir Abdixhiku, ka përkujtuar nënkryetarin e LDK-së, dijetarin e madh shqiptar, Prof. Fehmi Agani, në 23-vjetorin e vrasjes së tij.
”Sot, bëhen 23 vjet nga vrasja e ideologut, intelektualit dhe dijetarit të madh shqiptar, Prof. Fehmi Agani. Si shkrimtar, si gazetar, si politolog, si sociolog e mbi të gjitha si atdhetar i madh, profesor Agani ishte pjesë e gjeneratës së artë intelektuale e politike shqiptare në Kosovë gjatë fundshekullit të kaluar”, ka shkruar Abdixhiku në rrjetin e tij social, Facebook.
Ai ka thënë se vrasja e tij nga forcat ushtarake serbe, ishte një hakmarrje e qëllimshme ndaj lëvizjes së tyre politike për liri dhe pavarësi.
”Vrasja e tij nga forcat ushtarake e policore serbe ishte hakmarrje e qëllimshme ndaj lëvizjes sonë politike për liri e pavarësi. Ishte vrasje e boshtit intelektual e ideologjik të vet Kosovës. Si e tillë, ajo u shndërrua shenjë e pafuqisë së aparatit represiv serb ndaj idesë sonë kolektive për liri e pavarësi”, është shkruar në postim.
Gjithashtu, Abdixhiku ka shtuar se Fehmi Agani ishte një ndër figurat kryesore në krijimin e Lidhjes Demokratike të Kosovës dhe shërbeu si nënkryetar i saj. Sipas tij, ai ishte si dora e djathtë e Presidentit historik, Dr. Ibrahim Rugova.
Ndërsa, në përvjetorin e rënies së Aganit, ai ka nderuar figurën e tij, duke thënë se vazhdon të jetë inspirim për rrugëtimin tonë politik drejt së ardhmes.
”Sot, në përvjetorin e rënies së Prof. Fehmi Aganit, ne nderojmë dhe kujtojmë figurën, rolin dhe kontributin e tij të jashtëzakonshëm për lirinë dhe pavarësinë e vendit. Ai vazhdon të jetë inspirim për rrugëtimin tonë politik drejt të ardhmes”, ka përfunduar Abdixhiku.
Fehmi Agani u lind në Gjakovë në vitin 1932, ku dhe mbaroi shkollimin fillor. Shkollimin e mesëm e kreu në Prishtinë, ndërsa studimet për filozofi i mbaroi në Universitetin e Beogradit; ku dhe magjistroi në shkenca politike. Gradën doktor i shkencave të sociologjisë e mori në Fakultetin Filozofik të Universitetit të Prishtinës më 1973, në temën “Partitë dhe grupet politike në Shqipëri gjatë Luftës së Dytë Botërore”.
Gjatë viteve 50-ta e 60-ta, ai punoi si profesor i shkollave të mesme në Gjakovë dhe në Prishtinë, ndërsa më vonë ishte i anagzhuar si gazetar dhe redaktor i politikës së jashtme në gazetën ”Rilindja”. Në vitet 60-ta nisi punën ligjërues i sociologjisë në Fakultetin Filozofik; për të përfunduar si dekan aty.
Në vitin 1967, profesor Agani u zgjodh drejtor themelues i Institutit Albanologjik të Prishtinës. Fehmi Agani ishte themelues i Degës së Sociologjisë dhe të Filozofisë në Fakultetin Filozofik dhe i Institutit të Sociologjisë të këtij fakulteti. Ai ishte kryeredaktor i revistave Studia Humanistica dhe Thema.
Në fund të vitit 1989, ai së bashku me intelektualë e patritotë të kohës, themeloi lëvizjen më të madhe politike të shqiptarëve të Kosovës – Lidhjen Demokratike të Kosovës. Pjesa tjetër është histori lavdie.