Zhgënjyese dhe të rrezikshme e ka cilësuar qasjen e kryeministrit Albin Kurti në lidhje me veriun e Kosovës, kryetari i LDK-së, Lumir Abdixhiku.
Fillimisht, ai i ka dënuar sulmet e protestuesve serbë ndaj Policisë së Kosovës, KFOR-it dhe gazetarëve.
Ai e ka akuzuar Kurtin se për shkak të mungesës së koordinimit me aleatët ndërkombëtarë po i rrezikon raportet me ta.
Sipas tij, qasja e kryeministrit e ka përplasur Kosovën me Perëndimin, duke rënë kështu në grackën e Serbisë.
Abdixhiku është shprehur se asnjëherë më parë Kosova nuk është gjendur në këtë pozitë që është tani.
“Nga përplasja me grupet kriminale në veri, Qeveria e Kosovës po përfundon në përplasje me vetë Perëndimin, duke rënë kështu në grackën e Serbisë. Reagimet e shteteve mike kundër institucioneve të Kosovës, reagimet e SHBA-së, Gjermanisë, Francës, BE-së e vetë NATO-s, dëshmojnë pozicionin e rëndë diplomatik e strategjik në të cilin gjendet Kosova. Në një pozicion të tillë Kosova nuk është gjendur asnjëherë më parë”, ka thënë ai.
Abdixhiku i ka bërë thirrje Qeverisë së Kosovës që të koordinohet me aleatët ndërkombëtarë, teksa ka shtuar se “LDK-ja nuk do të lejojë për asnjë çmim, asnjë politikan e asnjë Qeveri, t’i rrezikojë themelet e shtetësisë”