Presidentja e Kosovës, Vjosa Osmani, me ftesë të presidentes së Parlamentit Evropian, Roberta Metsola, do t’i adresohet Parlamentit Evropian këtë të mërkurë.
Kështu është bërë e ditur në njoftimin e zyrës së presidencës, ku thuhet se kjo është hera e parë që një president i Kosovës si shtet i pavarur, do t’i drejtohet seancës plenare të Parlamentit Evropian.
“Presidentja Osmani do t’i adresohet deputetëve të Parlamentit Evropian lidhur me arritjet e Kosovës dhe rrugën e saj drejt anëtarësimit në Bashkimin Evropian. Ajo do të shprehë mirënjohjen e qytetarëve të Kosovës për përkrahjen që Parlamenti Evropian ka ofruar për Kosovën që nga vitet e 90-ta”, thuhet në njoftim.
Presidentja e Parlamentit Evropian, Roberta Metsola, do të presë në takim Osmanin në orën 11:05, ndërkaq në orën 11:20 është paralajmëruar konferencë e përbashkët për media.
Gjatë qëndrimit në Strasburg, ku po mbahet seanca e Parlamentit Evropian, Osmani do të pritet fillimisht nga presidentja e Parlamentit Evropian, Roberta Metsola, në një takim për të diskutuar bashkëpunimin ndërmjet Kosovës dhe këtij institucioni, e pastaj do të takojë edhe udhëheqësit e grupeve kryesore politike të përfaqësuara në Parlamentin Evropian.
Përveç takimeve me përfaqësues të Parlamentit Evropian, gjatë qëndrimit në Strasburg, Osmani do të takojë edhe përfaqësues të Këshillit të Evropës.
Osmani në një postim në Facebook ka thënë se para këtij institucioni do të përçojë mirënjohjen e popullit të Kosovës për kontributin e Parlamentit Evropian për lirinë.
“Nesër, në emër të qytetarëve të Republikës së Kosovës do t’i adresohem Parlamentit Evropian. Në vitin 1998, Presidenti Rugova, si fitues i çmimit Sakharov, iu adresua po këtij institucioni, për të kërkuar mbështetjen e popujve evropianë për lirinë e Kosovës. 25 vite pas, para po të njëjtit institucion, do ta përçoj mirënjohjen e popullit të Kosovës për kontributin e Parlamentit Evropian për lirinë, demokracinë dhe pavarësinë tonë si dhe për rrugëtimin tonë evropian”, shkroi ajo.
25 vjet pas, Osmani mban fjalim në PE ku Rugova ishte nderuar me çmimin Saharov