Njësia speciale e Policisë së Shqipërisë, RENEA, e kanë kryer një operacion në kampin MEK në Manzë të Durrësit.
Burime nga Policia e Shtetit për Euronews Albania bëjnë me dije se vdekja e një personi gjatë operacionit të policisë në kampin e muxhahedinëve në Manzë, nuk lidhet me veprimet apo mosveprimet e efektivëve.
Sipas policisë, viktima ka ndërruar jetë si pasojë e infraktit dhe nuk lidhet me operacionin.
Ministria e Brendshme ka reaguar në lidhje me tensionet që ndodhën ditën e sotme në MEK në Manzë të Durrësit, ku për pasojë disa persona kanë mbetur të plagosur, ndërsa një person ka humbur jetën.
Në njoftim thuhet se operacioni i sotëm i Policisë së Shtetit në vendqëndrimin e MEK është në zbatim të plotë të urdhrit të SPAK dhe vendimit të Gjykatës së Posaçme kundër Korrupsionit dhe Krimit të Organizuar.
“Vendimi i Gjykatës është pasojë e veprimeve që bien haptazi ndesh me marrëveshjen dhe angazhimet e marra nga grupimi MEK prej vitit 2014 kur u vendosën në Shqipëri vetëm për qëllime humanitare. Fatkeqësisht ky grupim nuk u është përmbajtur këtyre angazhimeve, duke thyer marrëveshjen. Ndërhyrja e Policisë së Shtetit ka qenë konform ligjit dhe në zbatim korrekt të procedurave që kërkojnë operacione të tilla. Veprimet e Policisë së Shtetit për zbatimin e ligjit janë kryer si në çdo pjesë tjetër të territorit të Republikës së Shqipërisë”- njofton Ministria.
Sipas Ministrisë, brenda kampit ka pasur rezistencë ndaj kryerjes së punës së Policisë së Shtetit, çka bie ndesh me kuadrin procedural të zbatimit të ligjit.