Një person është gjetur pa shenja jete, të martën e 10 majit në Zubin Potok.
Kështu ka njoftuar Policia e Kosovës përmes raportit 24 orësh, ku theksohet se vdekja e viktimës është konstatuar nga mjeku kujdestar nga shtëpia e shëndetit në Zubin Potok.
“Në lagjen Jesa në Zubin Potok, të martën rreth orës 12:50 është gjetur pa shenja jete viktima mashkull kosovar. Vdekjen e tij e ka konstatuar mjeku kujdestar nga shtëpia e shëndetit në Zubin Potok”, thuhet në raport.
Siç theksohet në raport, me vendim te prokurorit kujdestar, trupi i pajetë i viktimës është dërguar në Institutin e Mjekësisë Ligjore për obduksion.
Rastin policia e ka cilësuar si “vdekje e dyshimtë”.
Ndryshe, gjatë ditës së martë, policia ka raportuar për një vrasje, ku një 30 vjeçar ka mbetur i vdekur si pasojë e lëndimeve të marra nga të shtënat me armë zjarri që kanë ndodhur të martën rreth orës 14:00 në magjistralen Ferizaj-Kaçanik.
Lajmin për Portali D e ka konfirmuar Kanun Veseli, zëdhënës i Policisë së Kosovës për rajonin e Ferizajt, i cili ka bërë të ditur se në rast janë përfshirë dy persona.
“Nga informatat e para njëri për pasojë ka ndërruar jetë në vendin e ngjarjes, kjo konfirmuar nga ekipet mjekësore, ndërsa tjetri është transportuar për ndihmë mjekësore ne Ferizaj e më pas është transportuar për QKUK për trajtim te mëtutjeshëm mjekësor”, ka thënë për Portali D, Zëdhënësi i Policisë për regjionin e Ferizajt, Kanun Veseli.
30 vjeçari, H.B. që u vra të martën në Kaçanik jetonte jashtë vendit, derisa të premten ai kishte ardhur për pushime në Kosovë.
Po ashtu në këtë ngjarje tragjike, i plagosur ka mbetur edhe vëllai i tij, 32 vjeçari K.B.
Ndërkaq, bazuar në raportin e policisë, brenda 24 orëve të fundit raportohet për 19 persona të arrestuar dhe 16 të dërguar në mbajtje.