Kryeministri i Kosovës, Albin Kurti, në kuadër të vizitës së tij në Britaninë e Madhe, ka njoftuar se është takuar me ish-kryeministrin britanik Tony Blair.
Me anë të një postimi në Twitter, Kurti ka thënë se gjatë këtij takimi e ka falënderuar për rolin e tij në përfundimin e okupimit të Kosovës.
Po ashtu, ai tha se e ka njoftuar për progresin e brendshëm dhe konstruktivitetin e Kosovës në dialogun me Serbinë.
“Shumë i lumtur që pata mundësinë ta takojë ish-kryeministrin e Britanisë së Madhe, Tony Blair. E falënderova për rolin e tij në përfundimin e okupimit të Kosovës, duke bërë të mundur që ne të ndërtojmë një shtet të vërtetë demokratik. E njoftova po ashtu për progresin e brendshëm dhe konstruktivitetin e Kosovës në dialogun me Serbinë”, shkroi Kurti.
Very pleased to have the opportunity to meet fmr 🇬🇧 PM Tony Blair. I thanked him for his role in ending occupation of 🇽🇰, making it possible for us to build a bona fide democratic state. I also informed him of Kosova’s domestic progress & constructiveness in dialogue with Serbia.
— Albin Kurti (@albinkurti) June 26, 2023
Ndryshe, Kurti, ka zhvilluar një bisedë telefonike me Sekretarin Amerikan të Shtetit, Anthony Blinken.
Sipas njoftimit të Kryeministrisë, Kurti e falënderoi Sekretarin Blinken për mbështetjen e vazhdueshme të ShBA-ve për Republikën e Kosovës.
“U diskutua për dialogun me zyrën e Përfaqësuesit të Lartë të BE-së për Politikë të Jashtme dhe Siguri, Josep Borrell për deeskalim dhe normalizim, me ç ‘rast kryeministri Kurti e njoftoi Sekretarin Blinken për takimin bilateral të së enjtes së javës së kaluar, që nuk u bë edhe trilateral për shkak të mosgatishmërisë së presidentit të Serbisë”, thuhet në njoftimin e kryeministrisë.
Tutje njoftohet se kryeministri Kurti dhe sekretari Blinken kanë bashkëbiseduar për gjendjen në katër komunat veriore të Kosovës, për zgjedhjet e reja, për ekstremistët e dhunshëm që sulmuan ushtarët e KFOR-it, Policinë e Kosovës e gazetarët, për tri nënkryetaret serbe në Leposaviq, Zveçan e veri të Mitrovicës, për konfiskimin e armatimit e municionit të shumtë në një veturë me targa të Beogradit.