Kuvendi i Kosovës, të premten e 13 majit, do të mbajë vazhdimin e seancës, ndërsa në rend dite është edhe debati parlamentar për punën e Qeverisë së Kosovës në vitin e parë të mandatit të saj.
Seanca do të fillojë në orën 11:00.
Si rendi i ditës në këtë seancë do të jenë pikat e papërfunduara nga seanca plenare, e mbajtur më 5 maj 2022.
Pjesë e rendit të ditës do të jetë edhe shqyrtimi i dytë i Projektligjit nr.08/L-056 për Mbrojtjen e Konkurrencës.
Ndër to, është edhe shqyrtimi i parë i Projektligjit nr.08/L-142 për ndryshimin dhe plotësimin e ligjeve që përcaktojnë shumën e beneficionit në lartësi të pagës minimale, procedurat e caktimit të pagës minimale dhe shkallët tatimore në të ardhurat personale vjetore.
Pastaj do të jetë shqyrtimi i parë i Projektligjit nr.08/L-143 për ndryshimin dhe plotësimin e Ligjit nr.08/L-066 mbi ndarjet buxhetore për Buxhetin e Republikës së Kosovës për vitin 2022.
Do të diskutohet edhe për emërimin e Komisionit për Mbrojtjen e Konkurrencës, gjithashtu, edhe formimi i Komisionit Ad-hoc për përzgjedhjen e kandidatëve për një anëtar të Bordit të Radiotelevizionit të Kosovës, nga komuniteti shqiptar.
Ndërkaq si pjesë e kësaj seance do të jetë edhe debati parlamentar për punën e Qeverisë së Republikës së Kosovës në vitin e parë të mandatit të saj.