Kreu i grupit mercenar “Wagner” thotë se do të vazhdojë aktivitetet e tij në Afrikë dhe Bjellorusi, por se aktualisht nuk është duke rekrutuar luftëtarë të rinj.
Grupi po vendoste për objektivat e tij të radhës, tha Yevgeny Prigozhin, në një mesazh audio të publikuar nga një llogari Telegram e lidhur me “Wagner”, raporton BBC
Luftëtarët “Wagner” kanë luajtur një rol kyç gjatë pushtimit rus të Ukrainës.
Në qershor, disa mijëra prej tyre morën pjesë në një kryengritje jetëshkurtër kundër udhëheqjes ushtarake të Rusisë.
Në mesazhin e tij audio, Prigozhin tha se shumica e luftëtarëve të “Wagner”-it ishin aktualisht në pushim, sepse “para kësaj kishte një periudhë të gjatë pune shumë të vështirë”.
Ai tha se grupi po vendoste për detyrat e ardhshme, të cilat “do të kryheshin për madhështinë e Rusisë”.
Grupi do të qëndronte “aktiv në Afrikë dhe në qendrat stërvitore në Bjellorusi”, shtoi ai në mesazhin e tij – i cili u publikua në llogarinë e Zonës Gri.
Ai nuk dha detaje të mëtejshme, megjithëse “Wagner” dihet se është aktiv në shumë pjesë të Afrikës. Luftëtarët e saj kanë qenë gjithashtu në Bjellorusi për të mësuar forcat e mbrojtjes territoriale.
“Ndërsa ne nuk po përjetojmë ndonjë deficit në personel, ne nuk planifikojmë të bëjmë rekrutime të reja,” tha zoti Prigozhin.
“Megjithatë, ne do t’ju jemi jashtëzakonisht mirënjohës nëse mbani kontakte me ne dhe sapo atdheu të kërkojë një grup të ri që do të jetë në gjendje të mbrojë interesat e vendit tonë, sigurisht që do të fillojmë të rekrutojmë”.
Ai shtoi se nuk kishte kufizime të vendosura për luftëtarët e saj për t’u transferuar në “strukturat e tjera të pushtetit” të Rusisë dhe “për fat të keq, disa” ranë dakord ta bënin këtë.
Pas rebelimit të dështuar të “Wagnerit”-it më 24 qershor, presidenti Vladimir Putin ftoi luftëtarët nga grupi që nuk morën pjesë në kryengritje, për të nënshkruar kontrata me Ministrinë ruse të Mbrojtjes.
Në zhvillime të tjera, të paktën një person u vra të hënën në mëngjes në qytetin ukrainas të Kryvyi Rih pas sulmeve me raketa ruse, sipas Ministrisë së Brendshme.
Ndërkohë, një sulm me dron është raportuar në rajonin kufitar të Rusisë, Bryansk – me guvernatorin Alexander Bogomaz duke thënë se një stacion policie u godit.
Të shtunën, zyrtarët rusë thanë se tre dronë ukrainas u rrëzuan në Moskë – i fundit në një seri sulmesh me dron në kryeqytetin rus.
Kryebashkiaku i Moskës Sergei Sobyanin fajësoi Ukrainën për sulmin, në të cilin u dëmtuan dy blloqe zyrash, megjithëse nuk pati viktima.
Presidenti i Ukrainës, Volodymyr Zelensky, paralajmëroi se lufta po i kthehet Rusisë dhe se sulmet në territorin rus ishin një “proces i pashmangshëm, i natyrshëm dhe absolutisht i drejtë” i luftës midis dy vendeve.