Pas më shumë se një orë ka përfunduar takimi në mes Kryeministrit të Republikës së Kosovës, Albin Kurti dhe ministrave të kabinetit të tij.
Ministrat kanë filluar të dalin nga zyra e kryeministrit pa dhënë detaje.
Njësoj është larguar edhe Ministrja Hajdari. Shkarkimi i kësaj të fundit është kërkuar nga opozita pas arrestimeve që ndodhen në dikasterin ku ajo udhëheq.
Ndryshe, në bastisjet që ka realizuar Policia e Kosovës në mëngjesin e premtes në Ministrinë e Industrisë, Ndërmarrësisë dhe Tregtisë ka arrestuar dy punonjës të këtij dikasteri.
Të arrestuarit janë drejtori i Divizionit për Rezervat Shtetërore të Mallrave, Hafiz Gara, dhe drejtori i Departamentit për Integrim Evropian dhe Koordinim të Politikave, Irfan Lipovica.
Policia gjatë bastisjes në pronën dhe biznesin e Ridvan Muharremit, e ka arrestuar të njëjtin si njëri nga personat e dyshuar në këtë rast.
Aksioni është zhvilluar pas publikimit të disa audioincizimeve nga gazeta “Nacionale”, në të cilat dëgjohen dy zyrtarë të MINT-it të cilët pretendojnë se vaji i paguar nga shteti i Kosovës nuk ka ardhur nga Polonia në Kosovë, edhe pse për atë sasi shteti kishte paguar.