Ligji ishte votuar pa zhurmë e pa prezencë të opozitës, e muaj pas radha i erdhi edhe themelimit të mekanizmit.
Bëhet fjalë për ligjin për mbrojtje të informacionit të klasifikuar, në kuadër të së cilit është krijuar agjencia që merret ekskluzivisht me mbrojtje të informacionit e verifikim të sigurisë.
E gjithë kjo përgjegjësi dikur ishte nën petkun e Agjencisë së Inteligjencës, e rrjedhimisht nën urdhrat e shefit të AKI-së.
Këtë javë kryeministri emëroi Emin Hoxhajn si drejtor të AMIK-ut që është akronimi i kësaj agjencie.
Nga ekzekutivi tregojnë për televizionin se ku është tash kjo agjenci me funksionalizimin dhe se kujt do t’i raportojë.
“Themelimi i AMIK është bërë me ligj. Tani, pas emërimit të drejtorit, ka filluar puna në hartimin e rregullores së brendshme për funksionalizimin e punës. Drejtori, sipas ligjit, emërohet, shkarkohet nga dhe i përgjigjet Kryeministrit. Sipas vetë ligjit, ky agjencion është ndarë nga AKI, prandaj edhe është krijuar si agjencion në vete në Zyrën e Kryeministrit. Si rrjedhojë, Zyra e Kryeministrit është i vetmi autoritet të cilit i raporton”, thuhet nga Qeveria.
Përderisa nga opozita ka pasur zëra kritikues se raportimi drejtpërdrejt te kryeministri e ndarja nga AKI –ja shton rrezikun për kapje politike, eksperti i sigurisë Nuredin Ibishi vlerëson se ndarja e këtyre mekanizmave i kontribuon të drejtës.
“Të hiqet ajo barrë e pa qenë në ISh- AKI-në, se mandej aty ka edhe implikime politike, ngase ai departament është në kuadër të krye shefit ekzekutiv të AKI-së, dhe shpesh herë të verifikimi I sigurisë kemi pasur edhe skandale kanë shkuar çështjet deri në gjykatë”, ka thënë Nuredin Ibishi – ekspert i sigurisë.
Drejtori i sapoemëruar i AMIK, është ish-pjesëtari i Ushtrisë Çlirimtare të Kosovës, përderisa ka qenë edhe pjesë e Policisë së Kosovës nga viti 2001, duke shërbyer si shef i Njësisë së Hetimeve të Krimeve Ekonomike dhe Korrupsionit dhe tash së fundmi si shef i Njësisë së Hetimeve të Përgjithshme në Gjakovë.