Ish-luftëtari i Ushtrisë Çlirimtare të Kosovës, Hysni Gucati, është liruar nga Gjykata Speciale në Hagë me kushte të veçanta.
Lirimi i tij është konfirmuar nga Dhomat e Specializuara të Kosovës, të cilat kanë bërë të ditur se Gucati do të mbetet nën disa kushte gjatë pjesës së mbetur të dënimit.
Gucati menjëherë pas lirimit dhe ardhjes në Kosovë u rrethua nga familjarët dhe bashkëfshatarët e tij në odën e tij në Morinë të Skënderajt.
Ai ka dëshiruar të mbetet i kufizuar në deklarimet për media pasi edhe është i detyruar të marrë leje nga Gjykata Speciale për komunikim publik.
“Mundësisht kursemni, më kurseni mundësisht”, është shprehur ai para gazetarëve.
Gucati ka bërë të ditur se do të bisedojë më vonë me avokatët e tij për të diskutuar se çfarë mund të flasë dhe çfarë nuk mundet.
Gjithashtu, ai është takuar me nënën e tij, moment që ka shkaktuar emocione të forta.
Më 12 tetor, kryetarja e Dhomave të Specializuara të Kosovës (DHSK), gjykatësja Ekaterina Trendafilova, ka vendosur të modifikojë dënimin për Hysni Gucati, duke lejuar lirimin e tij.
Kështu është bërë e ditur në komunikatën e Dhomave të Specializuara të Kosovës, ku thuhet se edhe pse veprat penale për të cilat ai u dënua janë të rënda, vendimi për modifikim të dënimit është marrë nga “ndryshimet në sjelljen dhe veprimet e Gucatit gjatë kohës së paraburgimit”.
Në komunikatë, po ashtu, thuhet se Gucati ka dhënë zotimin se nuk do të përfshihej në vepra të tjera që mund të karakterizoheshin si vepra penale kundër administrimit të drejtësisë dhe do të përmbushte të gjitha kushtet e përcaktuara për lirimin e tij.