Ambasada e Gjermanisë dhe ajo Francës në Kosovë kanë reaguar për polemikat që u bënë në media për homazhet që bënë në vitin 2022 ambasadori francez, Olivier Guerot dhe ai gjerman, Jorn Rohde, te një pllakë memoriale, e cila nderon ushtarët e rënë në luftë në Kosovë midis viteve 1912-1918.
Ata këto homazhe i bënë më 11 nëntor të vitit 2022, ditë kjo që shënon fundin e Luftës së Parë Botërore.
Në këtë deklaratë thuhet se ceremonia e tyre u njollos nga polemikat që u bënë në mediat e caktuara në Kosovë. Sipas tyre, kjo polemikë, që erdhi në media për shkak të pranisë së një pllake përkujtimore që u bënte homazhe ushtarëve serbë që vdiqën midis viteve 1912 dhe 1918, ishte e padenjë.
“Më 11 nëntor, ambasadorët francezë dhe gjermanë bënë homazhe të përbashkët për ushtarët e tyre të rënë. Kjo ditë shënon fundin e Luftës së Parë Botërore dhe ambasadorët Guérot dhe Rohde nënvizuan në deklaratat e tyre se nderimi i përbashkët i ushtarëve tanë që ishin armiq në atë kohë mbart një mesazh të fortë pajtimi. Është edhe dita e veteranëve francezë, një ditë për të kujtuar të gjithë ushtarët tanë që humbën jetën në krye të detyrës.
Në vitet e fundit dhe veçanërisht në vitin 2022, kjo ceremoni e përbashkët franko-gjermane u njollos nga një polemikë në media të caktuara në Kosovë për praninë e një pllake përkujtimore që u bënte homazhe ushtarëve serbë që vdiqën midis viteve 1912 dhe 1918. Serbia dhe Franca ishin aleate gjatë Luftës së Parë Botërore. Kjo polemikë ishte e padenjë për kujtimin e të gjithë ushtarëve: ushtarëve francezë, gjermanë dhe serbë të vdekur në Luftën e Parë Botërore, por edhe të 18 ushtarëve francezë që vdiqën gjatë shërbimit të tyre për KFOR-in, në mbrojtje të të gjitha komuniteteve të Kosovës”, thuhet në reagimin e tyre.
Ata u shprehën të zhgënjyer se homazhet e tyre u keqinterpretuan dhe shkaktuan shfrytëzim politik.
Gjithashtu, bënë të ditur se instalimi i një pllake përkujtimore është bërë me iniciativën e Ambasadës franceze, ku më pas pllaka përkujtimore për ushtarët serbë u zhvendos disa metra më tutje.
“Instalimi i një pllake përkujtimore të re që kujton sakrificën e të gjithë ushtarëve francezë në Kosovë është bërë me iniciativën e Ambasadës së Francës. Më pas, pllaka përkujtimore për ushtarët serbë është zhvendosur vetëm disa metra, me respektin më të madh pas informimit të Komunës. Asnjë trup i ushtarëve nuk u zhvendos. Kjo pllakë përkujtimore mbetet plotësisht e dukshme në të njëjtin vend, siç mund ta shohë çdokush në vend dhe në foton e bashkëngjitur.
Ambasadat e Francës dhe Gjermanisë janë të zhgënjyera që ky gjest u keqinterpretua dhe shkaktoi shfrytëzim politik. Nderimi dhe respekti i bërë për kujtimet e ushtarëve tanë duhet të mbeten në qendër të këtij përkujtimi. Ambasada e Francës mbetet në kontakt me autoritetet përkatëse. Ne do të vazhdojmë t’u bëjmë homazhe të gjithë ushtarëve që vdiqën gjatë Luftës së Parë Botërore”, thuhet më tutje në reagim.
