Arian Zeka ka thënë se viti 2022 nuk është viti i dhënies së 100 eurove e as i tërheqjes së trustit. Sipas tij, Qeveria Kurti nuk po përpiqet të tregojë se di të menaxhojë situatën e krijuar në vend me rritjen e çmimeve të produkteve ushqimore.
Drejtori ekzekutiv i Odës Ekonomike Amerikane në Kosovë, Arian Zeka, megjithëse ka vlerësuar përpjekjen e organizatorit të protestës Adnan Jasharit për “Pro tërheqjes së 30 për qind të trustit”, ai ka shtuar se tërheqja e trustit nuk do të shuante problemin e krizës.
Ai ka thënë se Oda Ekonomike ka sugjeruar zgjatjen e listës se ushqimeve që lirohen nga tatimi mbi vlerën e shtuar dhe konsiderimin e normave të tatimeve direkte. Qeveria nuk po dëshmon se di ta menaxhojë këtë krizë.
Sipas Zekës, vështirësia e sigurimit të ushqimit pritet të vazhdojë duke pasur për faktorë edhe luftën në Ukrainë dhe zingjirët e importimit të tregut të jashtëm.
I të njëjtit mendim, është edhe analisti Visar Ymeri.
“Do të bëhemi barrë i një buxheti të ardhshëm”, ka thënë Ymeri gjersa ka theksuar se ideja e 100 eurove është gabim dhe se tërheqja e trustit nuk do të ishte një zgjidhje efikase për adresimin e çështjeve sociale.
Më tej, Ymeri ka theksuar se kritika ndaj qeverisë është se shpeshherë, kjo e fundit, tregohet shpërfillëse dhe pa ide.
“Me tërheqjen e trustit do të rëndohet problemi”, ka theksuar ai.
Kësaj i është përgjigjur Deputeti i Aleancës për Ardhmërinë e Kosovës (AAK), Shesedin Dreshaj, i cili ka thënë se në një situatë të tillë, kur nuk ka asnjë veprim në aspektin e lehtësimit të tariftave, opozita nuk ka i kërkuar asgjë tjetër, përpos tërheqjes së trustit për para që qytetarët i kanë kursyer vetë.
Një ide e tillë nga Ymeri është cilësuar si ideja “Sot, për sot”. Ai ka thënë se një ndër idetë me të cilat do të duhej të bazohej qeveria është ajo e targetimit të çmimeve dhe mbajtja stabile e tyre.
Deputeti i Partisë Demokratike të Kosovës, Bekim Haxhiu, u kishte bërë thirrje deputetëve të Kuvendit të Kosovës që ta mbështesin projektligjin, duke theksuar se kjo nuk është vetëm kërkesë e tij, por e të gjithë qytetarëve të Kosovës.