Dogana e Kosovës, ka njoftuar për largimin e nëntë zyrtarëve doganorë nga puna, ndaj të cilëve është në vijim procesi gjyqësor penal.
Sipas njoftimit të doganës, zyrtarët fillimisht janë suspenduar, ndërkaq më pas, në bazë të provave të administruara, është vendosur për shkëputje përfundimtare të marrëdhënies së punës.
“Dogana e Kosovës ka marrë vendim për largim nga puna të nëntë zyrtarëve doganorë, ndaj të cilëve është në vijim procesi gjyqësor penal”, thuhet në njoftim.
Ndonëse arsyet e shkarkimit të zyrtarëve nuk janë specifikuar, megjithatë në njoftim theksohet se veprimet dhe mosveprimet e tyre kanë qenë të dënueshme dhe paraqesin shkelje të rëndë të Kodit të Mirësjelljes.
“Provat e administruara janë të qarta për të dëshmuar se veprimet dhe mosveprimet e zyrtarëve në këtë rast janë të dënueshme dhe paraqesin shkelje të rëndë të Kodit të Mirësjelljes”, vijon njoftimi.
“Në kuadër të stafit të Doganës së Kosovës ka vlera shumë të larta profesionale dhe integritet, të cilat po bëjnë të mundur që me efikasitet të dalluar të luftohen dukuritë që dëmtojnë besimin dhe efikasitetin e organizatës, andaj kërkojmë nga publiku që të bashkëpunojnë me Doganën e Kosovës, duke siguruar informata dhe dëshmi që adresojnë kontrabandën dhe korrupsionin”, thuhet më tej në njoftim.
Po ashtu, thuhet se Dogana e Kosovës ka lansuar aplikacionin për pajisje të mençura e quajtur eDogana, zgjidhje kjo e cila paraqet një platformë të sigurt dhe të avancuar të komunikimit.