Ndër dekada, pengesa të shumta ka vënë përpara Serbia për kosovarët që kanë mësyrë të kalojnë me vetura me targa kosovare në territorrin e saj.
Por orët e para të vitit 2024, sollën ndryshimin kur për herë të parë u lejuan targat kosovare, pa mbulim të simboleve shtetërore të kalojnë nëpër pikat kufitare serbe.
Kjo po mirëpritet edhe nga qytetarët, e sidomos ata që bartin udhëtar pothuajse cdo ditë.
“Na deri tash menxi e kemi prit me padurim se nuk u kanë edhe ndonjë pengesë e madhe se ska pas punë 2 minuta, por qato 2 minuta të paktën nuk e kemi fiksim në krye me i ngjit ato tiket e me i mbulu targa është një punë e shkelqyer për qeverinë e Kosovës, që e ka bërë këtë punë na ka mundësu edhe neve si qytetaar të Kosovës, jemi krenar për këto punë”, tha Milaim Morina, shofer i autobusit.
“Është shumë vendim i mire, shumë i qëllum”, tha një qytetar.
Veprim të mirë, por të vonuar e sheh një qytetarr tjetër.
“E kam parë, e mirëpresim u dasht mu bë edhe më herët është vendim i mire, por pak i vonuar, rrugës ka erdha pash fluks në kufi Serbi – Kroaci, me targa të Kosovës, është gjë e mirë”, tha Astrit Hasanaj, qytetar.
Por, qytetarët me targa të Serbisë, edhe më tutje u duhet të ndalojnë e të mbulojnë simbolet e tyre, cka sipas tyre kjo tashmë është e panevojshme.
“Edhe Kosovës edhe Serbisë, i përshtatet. Nuk ka nevojë tani të shkëputet tiketa, dhe ne nuk kemi nevojë të ngjesim e të heqim tiketat. Ashtu krijojmë vetëm probleme, nëse thuhet “merrni ngjitni, e këputni keto letra”. Keshtu tash shkohet edhe ne Serbi edhe ne Kosove më lehtë me regjistrimet e te dyja vendeve”, tha Ajder Ferati, qytetar.
Në pikën kufitare në Merdare në pjesën e palës serbe, po qëndron tabela me deklaratën, ku thuhet se lejimi i kalimit të veturave me targa RKS nuk e paragjykon statusin final të Kosovës, e as nuk mund të interpretohet si pëlqim i Beogradit për ta devijuar rezolutën 1244.
Nga qeveria e Kosovës, nuk janë përgjigjur nëse do të veprohet njëjtë, duke lejuar lëvizjen e lirë të veturat me targa të Serbisë.
Kryeministri Kurti, javën e kaluar kishte thënë se do të presin të shohin nëse vendimet e Serbise do zbatohen në praktikë.
“Vendimin tonë të barasvlefshëm si çështje e marrëdhënieve reciproke do ta marrim sapo që policia jonë kufitare të dokumentojë dhe vërtetojë se Serbia po e zbaton të plotë dhe pa pengesa vendimin e saj. Besojmë se kjo qasje është e drejtë përveçse e arsyeshme”, tha Albin Kurti, kryeministër i Kosovës.
Pas vendimit të qeverisë serbe, edhe Bashkimi Evropian ka theksuar se pritjet nga Kosova janë që të ketë një përgjigje të ngjashme për veturat me targa serbe.