Vendimet e Bankës Qendrore të Kosovës për qarkullimin e valutave do të jenë temë kyçe në Bruksel të martën (sot), në ditën kur janë ftuar për takim përfaqësues të Kosovës dhe të Serbisë. Nga Bashkimi Evropian kanë thënë se takimet me palën kosovare dhe serbe do të mbahen në mëngjes. Është bërë e ditur se “do të kenë rrjedhën e takimeve në formatin e zakonshëm të dialogut”.
Bashkimi Evropian ka konfirmuar se të martën do të mbahet takimi në mes të Kosovës e Serbisë për të diskutuar “çështjen e dinarit”.
Kështu është bërë e ditur nga zëdhënësja e BE-së për çështje të Politikës së Jashtme dhe të Sigurisë, Nabila Masralli, e cila ka deklaruar se pala kosovare dhe ajo e Serbisë e kanë konfirmuar pjesëmarrjen.
“Ajo që unë mund të them është se po, do të kemi takim nesër. Takimi i nesërm është takim i dialogut, i cili do të fokusohet në zgjidhjet e çështjeve të hapura lidhur me vendimin e fundit për qarkullimin e valutave nga Banka Qendrore e Kosovës. Takimi do të nisë në mëngjes dhe do të ketë rrjedhën e takimeve në formatin e zakonshëm të dialogut. Dhe po, të dyja palët kanë konfirmuar pjesëmarrjen e tyre“, ka thënë ajo.
Në përgjigje për Dukagjinin, BQK-ja ka thënë se kohë më parë ka shprehur gatishmërinë për angazhim për t’u takuar edhe me Bankën Popullore të Serbisë (NBS).
“Banka Qendrore e Republikës së Kosovës (BQK) kohë më parë ka shprehur gatishmërinë që të angazhohet dhe takohet edhe me Bankën Popullore të Serbisë (NBS), për të fasilituar në përzgjedhjen e opsionit me të lehtë për procesin e transferimit të mjeteve përmes kanaleve bankare në llogaritë e përfituesve (në Euro)..Në këtë kuptim, edhe i përgjigjet ftesave kur janë të nevojshme, për takime të tilla informuese, siç edhe ka bërë në vazhdimësi edhe me prezencën ndërkombëtare në vend”, thuhet në përgjigjen e BQK-së.
Zëdhënësja e BE-së, Nabila Massralli, ka thënë se të dyja palët kanë konfirmuar se do të dërgojnë përfaqësuesit e tyre për këtë takim.
Ajo, gjithashtu, ka thënë se takimi do të zhvillohet në “formatin e zakonshëm i dialogut”.
Zëdhënësi i Bashkimit Evropian, Peter Stano, ka paralajmëruar se një takim i mundshëm i nivelit të lartë në kuadër të dialogut për normalizimin e marrëdhënieve Kosovë- Serbi, në mes të kryeministrit të Kosovës, Albin Kurti dhe presidentit të Serbisë, Aleksandër Vuçiq, nuk pritet të realizohet pa u zhvilluar një takim paraprak në nivel kryenegociatorësh.
Nga 1 shkurti i këtij viti ka hyrë në fuqi një rregullore e Bankës Qendrore të Kosovës, që e përcakton euron si monedhë të vetme për pagesat me para të gatshme në Kosovë.
Dinarët mund të mbahen në llogari bankare ose të shkëmbehen në euro.
Banka Qendrore e Kosovës ka siguruar se rregullorja e saj nuk e ndalon apo kufizon pranimin e mjeteve në llogaritë bankare në euro në bankat e licencuara në Kosovë dhe ka bërë thirrje për hapjen e këtyre llogarive.
Në komunikatën e bërë për medie thuhet se “qytetarët që ende nuk kanë llogari, mund të hapin një të tillë tek secila bankë, sipas Rregullores së BQK-së për qasje në Llogari Pagese për Shërbime Bazike, që për grupet e cenueshme e të skemave sociale nuk ka tarifë të hapjes e as të mirëmbajtjes, nga 1 janari 2024”.