Përzgjedhësi i Kosovës në futboll, Franco Foda, premton lojë agresive dhe sulmuese në ndeshjen miqësore kundër Armenisë.
Foda në konferencën për media, një ditë para ndeshjes, ka thënë ndër të tjera se është punuar më shumë në aspektin taktik.
“Armenia dhe Kosova kanë lojtarë shumë të mirë, sidomos taktikisht dhe që të dyja kanë paraqitje solide. Në tri ditët e fundit jemi koncentruar në aspektin taktik. Do të luajmë në mënyrë sa më agresive dhe të sulmojmë sa më shpejt”, u shpreh Foda.
Trajneri gjerman që do të debutojë te Kosova ndaj Armenisë, ka shtuar se edhe përkundër që koha nuk ka qenë e përshtatshme, ekipi është përgatitur shumë mirë.
“Kemi pasur seanca stërvitore shumë të mira në Prishtinë edhe pse koha nuk ka qenë aq e përshtatshme. Sidoqoftë, ekipi është në gjendje të mirë”, shtoi Foda.
Përballjen me armenët, të rëndësishme e ka quajtur sulmuesi i Kosovës, Vedat Muriqi.
“E gjithë skuadra është e përgatitur për këtë ndeshje, si fizikisht, ashtu edhe psiqikisht. Ndonëse janë ndeshje miqësore, është shumë e rëndësishme të fitojmë dhe të mësohemi me fitore”, tha Muriqi.
Ai ka theksuar se Kosova do të dëshmojë se ka ekip më të mirë se sa Armenia.
“Besoj që Kosova është favorite për ndeshjen e nesërme. Individualisht, por edhe si ekip, do ta demonstrojmë që jemi më të mirë. E njohim shumë mirë Armeninë të cilën e kemi studiuar”, deklaroi Muriqi.
Dueli miqësor ndërmjet Armenisë dhe Kosovës, do të zhvillohet të premten në Jerevan prej orës 17:00 me kohën e Kosovës.