Sot, më 1 prill është 15-vjetori anëtarësimit të Shqipërisë në NATO, një moment historik që jetësoi vizionin euroatlantik të popullit shqiptar për të qenë pjesë e Aleancës ushtarake më të fuqishme të kohës sonë.
Presidenti i Shqipërisë, Bajram Begaj, me këtë rast ka shprehur mirënjohjen për këtë moment të rëndësishëm për vendin, duke e cilësuar anëtarësimin në NATO si një realizim të aspiratave të kahershme të popullit shqiptar për të përjetuar përkatësinë perëndimore.
Ai për këtë moment e ka përmendur edhe heroin kombëtar, Gjergj Kastriot Skënderbeut, si një strateg i aleancës së parë politiko-ushtarake me Perëndimin.
“Ky anëtarësim realizoi aspiratën e kahershme të popullit shqiptar, duke e kthyer atë te përkatësia e vet perëndimore, e mishëruar që në filozofinë e heroit tonë kombëtar, Gjergj Kastriotit, si strateg i aleancës së parë politiko-ushtarake me Perëndimin”, ka shkruar Begaj në Facebook.
Presidenti Begaj ka falënderuar popullin shqiptar, SHBA-në dhe aleatët për mundësimin e këtij anëtarësimi, ndërkohë që ka theksuar rolin e Shqipërisë në sigurinë e vendit, rajonit dhe hapësirës Euroatlantike gjatë këtyre 15 viteve.
Gjatë këtyre viteve, siç ka thënë ai, Shqipëria ka sjellë më shumë siguri për vendin dhe rajonin duke kontribuar në misione paqeruajtëse dhe operacione të NATO-s, si: Afganistani, Iraku, Bosnja, Kosova, Bullgaria, Letonia dhe Deti Egje.
Në fund, presidenti Begaj ka bërë thirrje për vazhdimin e bashkëpunimit me aleatët në mbrojtjen e lirisë dhe në kontributin për një botë paqeje.