Visar Rrecaj, ish-polic, ka thënë se ministri i Punëve të Brendshme, Xhelal Sveçla, të fillojë të përgatisë profesionistë dhe të shtojë numrin e efektivëve në veri.
Kështu tha ai në emisionin “Five” në RTV Dukagjini, teksa ka komentuar deklaratën e ministrit se në Serbi po përgatiten terroristët.
“Institucionet e sigurisë duhet t’i marrin me seriozitet secilin informacion që e kanë dhe të punojnë në terren. E pashë një deklarim të ministrit që kishte zbuluar që atje po përgatiten terrorist, do të thoja nëse atje po përgatiten terrorist, Svecla le të fillojë dhe të përgatitë profesionistë. Duhet të shtojë numrin e efektivëve atje, të bëjë sa më shumë trajnime dhe të jemi sa më gati, të mos merret shumë me deklaratat, por të merret me punë konkrete”, tha ai.
Sa i përket blerjes së armatimit, Rrecaj thotë se institucionet duhet t’i marrin me seriozitet paralajmërimet nga ana serbe se të njëjtat do të testohen.
“Armatimi i tillë dhe paralajmërimi se do të testohen duhet të merret me ma shumë seriozitet, në të njëjtën kohë mund ta kemi parasysh s e mund të jetë taktizim”.
Ai theksoi se “sulme mund të ketë, por jo edhe luftë”.
Rrecaj thotë mungon prezenca e policisë së Kosovës në pjesën veriore.
“Aktualisht, veriu është i menaxhueshëm gati sa para qeverisjes Kurti, për faktin se para tri apo katër ditësh kam kaluar në pjesën veriore deri në Banjska dhe prezencë të institucioneve tona ka pak, sidomos të prezencës së policisë në uniformë”.
Ministri i Brendshëm, Xhelal Sveçla, ka thënë se rreth 400 ekstremistë serbë po trajnohen përreth kufirit me Kosovën.
Sipas tij, nevojitet vetëm një urdhër i presidentit serb, që ata të nisin sulme agresive.
“Rreth 400 ekstremistë serbë po trajnohen në zonat përreth kufirit me Kosovën dhe me një urdhër të Vuçiq mund të aktivizohen në sulme agresive”, ka thënë Sveçla për “News24”.