Deputetja e LDK-së, Hykmete Bajrami, i ka vazhduar polemikat në distancë me ministrin e Financave, Hekuran Murati, sa i përket çështjes së rritjes së pagave.
Bajrami e ka quajtur Muratin, “Ministër Propaganda”, sepse, sipas saj, janë gënjeshtra pretendimet e tij se pagat në sektorin publik janë rritur për 17 për qind në vitin 2023.
Po ashtu, deputetja e LDK-së e akuzoi Muratin për keqpërdorim të parasë publike, duke ia përmendur pagën prej 7 mijë e 500 eurosh të Gani Jakupit.
“Ministër propaganda po thotë që i ka rritë pagat 17%, në këtë 17% e paska llogaritë pagën 7500 euro të Gani Jakupit dhe pagën e vet e të stafit politik që ky me tu bërë ministër i financave i ka dyfishu. Realiteti është se askujt tjetër në vend në sektorin publik nuk i është rritë paga 17% gjatë vitit 2023, askujt. Dhe kur ti thua që i ke shpenzu më shumë 17% më shumë në paga kjo nuk i bjen që i ke rritë pagat për 17%, por i bjen që me taksat e qytetarëve po paguan Gani Jakupin e shokët e tij që nuk janë të paktë dhe ky është keqpërdorim i parasë publike”, tha ai.
Bajrami ka folur edhe për inflacionin në kohën sa ishte kryeministër Avdullah Hoti.
“Ndërsa sa i përket rritjes së pagave në kohën e Avdullah Hotit ministër i financave, ta kujtoj se inflacioni në atë kohë ka qenë -0.4 % (2015); 0.3% (2016) dhe 1.5% (2017), ndërsa në mandat tëndin inflacioni këto tri vite ka kalu 23%, d.m.th. çdo pagë është zhvlerësu me së paku 23%”, tha ajo.
Tutje, ajo e akuzoi ministrin e Financave edhe për mirëqenien e pensionistëve, duke e fokusuar kritikën te mosrritja e pensioneve të tyre.
“Pyeti pensionistët qysh ndihen sot. 100 eurot që ju ke dhënë njëherë gjatë vitit 2023 ju kanë përmirësu jetën atyre që i kanë marrë një javë, vetëm një javë, hiç ma shumë. Po të punoje e të dije, sot pensionet të ishin më të larta se paku për 23%, aq sa ka inflacion. Pensionistët nuk i kanë pasë problem çmimet e larta vetëm javën kur ti ju ke dhënë 100 euro, ata përballën me çmime të larta çdo ditë”, tha Bajrami.
Krejt në fund, deputetja Bajrami foli edhe për 70 milionët e ndarë për bizneset sa ishte LDK-ja në Qeveri, për të cilat tha se ishte masa më transparente në histori të ndonjë qeverie të Kosovës.
“Edhe e fundit ministër propaganda, 70 milionë euro që i kemi shpërnda për biznese në kohën e mbylljes totale të pandemisë ka qenë masa me transparente në histori të Qeverive të Republikës së Kosovës. Qysh po mendon me i arsyetu ti 881 milionë euro që i ke shpërndarë pa asnjë efekt, asnjë”, tha deputetja Bajrami.
“Çka ndodhi me 160 çerdhe?
4000 banesa për qifte të reja?
Shportë të konsumit me të lirë?
Energji me të lirë?
Etj?
E kujt është kjo propagandë?”, vijoi ajo.