Si metodë frikësuese dhe intimiduese e sheh gjetjen e një eksplozivi në veturën e një zyrtari serb, eksperti i sigurisë ndërkombëtare, Adrian Shtuni, i cili ka theksuar se me këto metoda po tentohet të destabilizohet, jo vetëm veriu i vendit, por e gjithë situata në Kosovë.
Nga këta aktorë që kërkojnë destabilizimin e vendit, po përdoret komuniteti serb, ka theksuar Shtuni.
“Kjo është një metodë që i kemi parë më herët, janë metoda frikësuese, intimiduese. Dhe fatkeqësisht po vazhdohet më të njëjtit avaz të mbajtjes peng të atyre, të cilët në veri kërkojnë të ecin përpara. Është një përdorim dhe shpërdorim i minoritet serb në veri nga aktorët që kërkojnë destabilizim dhe kanë bërë të njëjtën gjë, qoftë në aspektin e krimit e krimit të organizuar, qoftë në aspekte të tjera që kërkojnë destabilizim në veri dhe më gjerë, kjo është shumë problematike”, ka thënë Shtuni në “FIVE” të Dukagjinit.
Shtuni ka thënë se rasti i eksplozivit është shqetësues dhe shumë problematik në prag të procesit të votimit për apo kundër largimit të kryetarëve të Leposaviqit, Zubin Potokut, Zveçanit dhe Mitrovicës së Veriut, që do të mbahet më 21 prill.
“Shumë shqetësuese, jashtëzakonisht problematike, pasi krijon një atmosferë paniku, frikë dhe kjo nuk është në të mirë të mbarëvajtjes së sigurisë dhe aq më pak në të mirë të mbarëvajtjes së votimeve, ndërkohë e dimë që ka tensione të vazhdueshme qoftë në aspektin e sigurisë, qoftë në aspektin politik”, ka shtuar Shtuni.
Për rastin e eksplozivit ka folur në “FIVE” edhe zëvendësdrejtori i Policisë së Kosovës në veri, Veton Elshani, i cili ka thënë se policia është në krye të detyrës dhe qytetarët në veri janë të sigurt.
“Dhe ai mjet i dyshuar është tërheqë nën veturë ku kishte. Rrethanat dhe si është vendos aty varet nga hetuesit. Nuk kemi detaje të tjera. Angazhimet tona të përditshme në veriun e vendit vazhdojnë. Normal që janë të sigurt, katis raste mund të ndodhin, këto raste janë individuale. Këto nuk mund të themi që janë të adresuara ndaj institucionit, por ndaj një personi”, ka thënë Elshani
Kurse, gjatë së mërkurës, policia ka dhënë detaje lidhur me këtë rast në Leposaviq.
Serbi, i cili të martën raportoi në polici se nën veturën e tij në Leposaviq ka gjetur eksploziv, punon në institucionet publike të Kosovës. Ai dyshon se vepra ndaj tij është bërë në shenjë hakmarrjeje e frikësimi.
“Ankuesi mashkull serb kosovar ka raportuar se në veturën e tij ka vërejtur diçka të dyshimtë, që mund të jetë eksploziv. Në vendin e ngjarjes kanë dalë njësitet relevante policore, si dhe njësia për deminim e PK-së, e cila ka bërë deaktivizimin e eksplozivit. Nga vendi i ngjarjes janë tërhequr: një paketim eksploziv plastik PENT (prodhim serb), një detonator elektrik, një bateri 9 voltë, 6 magnete dhe një tel përçues. Ankuesi deklaron se nuk ka problem me askënd, mirëpo ai dyshon se vendosja e eksplozivit është bërë në shenjë hakmarrjeje e frikësimi, pasi ai punon në institucionet e Republikës së Kosovës. Rasti duke u hetuar”, thuhet në raportin 24-orësh.
E përveç policisë, për këtë ka reaguar dhe ministri i Punëve të Brendshme, Xhelal Sveçla, i cili publikoi pamjet e veturës që u gjet me një sasi eksplozivi në Komunën e Leposaviqit.
Kështu, Sveçla e ka akuzuar shtetin serb për terrorizëm, duke thënë se, kur humbet betejat politike, Serbia kthehet te retorika luftënxitëse dhe terrorizimi.
“Kur Serbia humbet betejat politike, në mungesë argumentesh kthehet te retorika luftënxitëse dhe aktet e dhunës deri në terrorizëm. Tendenca për kontrollin e pjesëtarëve të komunitetit serb në Kosovë vazhdon, por çdo ditë me më pak sukses. Zërat kundërshtarë në radhët e komunitetit po shtohen çdo ditë, për të çliruar qytetarët nga gangsterët dhe kuazi politikanët pro Serbi”, ka shkruar Sveçla në Facebook.
Më tej, Sveçla ka thënë se veprimeve kriminale në veri u ka kaluar koha.
“Kërcënimeve, djegies së pronave, vendosjes së eksplozivit dhe rrezikimit të jetës, por dhe shtypjes së atyre që mendojnë drejt e ndryshe, i ka kaluar koha. Tani, shteti ligjor është shtrirë në të gjithë territorin e Republikës sonë. Siguri, drejtësi dhe mirëqenie për të gjithë pa dallim dhe llogaridhënie për shkelësit e ligjit”, ka shtuar ministri Sveçla.