Izraeli do të “përcaktojë një çmim nga Irani në një mënyrë dhe kohë që na përshtatet neve”, tha të dielën ministri izraelit i kabinetit të luftës, Benny Gantz, pas sulmit me dronë dhe raketa nga Irani ndaj Izraelit.
Irani “takoi fuqinë e sistemit izraelit të sigurisë”, tha Gantz, duke iu referuar dëmit minimal të shkaktuar nga sulmi që përfshiu qindra predha, raporton CNN.
Sulmi tregoi se “bota qëndroi qartë së bashku me Izraelin përballë rrezikut”, tha Gantz.
Por, shtoi ai, “kjo ngjarje nuk ka përfunduar”, duke përmendur nevojën për të “ndërtuar një koalicion rajonal dhe për ta përcaktuar një çmim nga Irani, në një mënyrë dhe në një kohë që na përshtatet”.
Gantz tha gjithashtu se Izraeli ende duhet t’i kthejë pengjet në shtëpi dhe t’i sigurojë kufijtë e tij jugorë dhe veriorë në mënyrë që njerëzit që i lanë shtëpitë e tyre pranë këtyre kufijve të mund të kthehen.
Dy nga ministrat më të ashpër të qeverisë izraelite të dielën kërkuan gjithashtu një përgjigje të vendosur ndaj sulmit me dronë dhe raketa të Iranit ndaj Izraelit.
Ministri izraelit i Financave, Bezalel Smotrich duke kërkuar një përgjigje që “jehon në të gjithë Lindjen e Mesme” dhe ministri i Sigurisë Kombëtare Itamar Ben Gvir tha se Izraeli duhet “të çmendet”.
Smotrich, kreu i partisë së ekstremit të djathtë tha se nëse Izraeli heziton,”ne do ta vëmë veten dhe fëmijët tanë në rrezik ekzistencial”.
Në një deklaratë përmes videos, Smotrich e quajti këtë një “moment të së vërtetës”, duke thënë: “Nëse përgjigja jonë rezonon në të gjithë Lindjen e Mesme për brezat që do të vijnë – ne do të fitojmë”.
Ben Gvir, kreu i partisë tjetër të ekstremit të djathtë, tha se përgjigja e Izraelit nuk duhet të jetë “e dobët” dhe se “konceptet e kontrollit dhe proporcionalitetit janë koncepte që vdiqën më 7 tetor”, ditën e sulmit të Hamasit ndaj Izraelit.
As Smotrich dhe as Ben Gvir nuk janë anëtarë të kabinetit të luftës të Izraelit.