Edicioni i dytë i Forumit për Gratë, Paqen dhe Sigurinë, i organizuar nga presidentja Vjosa Osmani, fillon sot dhe do të zgjasë për dy ditë.
Në këto dy ditë në Kosovë do të jenë prezente personalitete të ndryshme nga disa shtete të botës.
Tema kyçe e edicionit të dytë të Forumit për Gratë, Paqen dhe Sigurinë pritet të jetë dhuna seksusale gjatë luftës.
Kështu bëri të ditur vetë presidentja Vjosa Osmani gjatë një konference për media të dielën.
“Në Prishtinë do të mblidhen më shumë se 40 shtete anembanë botës, liderë, ekspertë, akademikë, gazetarë e përfaqësues te shoqërisë civile. Forumi është një platformë që i dedikohet fuqizimit të zërit të grave”, tha presidentja dje në një konferencë për media.
Personalitete të tjera në këtë forum do të marrin pjesë: Presidentja e Republikës së Sllovenisë, Nataša Pirc Musar, presidenti i Republikës së Shqipërisë, Bajram Begaj, kryetarja e Kuvendit të Republikës së Shqipërisë, Lindita Nikolla, kryeministri i Republikës së Maqedonisë së Veriut, Talat Xhaferi etj.
Në këtë forum, do të ketë edhe një video-adresim të veçantë nga Hillary Clinton, sekretarja e 67-të e Shtetit të SHBA-ve.
Për këtë ngjarje, policia ka njoftuar se nga 14 e deri më 17 prill do të ketë bllokime të përkohshme apo riorientim në disa segmente rrugore.
Policia e Kosovës, gjatë kësaj kohe do të kujdeset për ofrimin e sigurisë, mirëmbajtjen e rendit e qetësisë publike dhe menaxhimin e trafikut gjatë kohës së lëvizjes së personaliteteve, si dhe qëndrimit të tyre në Republikën e Kosovës.
