Ministri i Shëndetësisë, Rifat Latifi, ka deklaruar se bordi i fondit për trajtim jashtë vendit do të pësojë ndryshime serioze.
Gjatë raportimi të tij në Komisionin për Shëndetësi dhe Mirëqenie Sociale, ministri Latifi ka thënë se këtë fond e kanë krijuar vetë, por nuk kanë krijuar kontrata me ndonjë vend tjetër apo spital për t’i bërë shërbimet, të cilat nuk kryhen në vend.
Ai ka paralajmëruar masa ndaj atyre që mund ta kenë keqpërdorur pozitën.
“Nëse vetëm edhe një pacient paguan më shumë se sa që duhet, është problematike. Organet përkatëse do të merren me këtë çështje. Bordi i fondit do të ketë ndryshme serioze dhe nëse dikush e ka keqpërdorur pozitën do të përgjigjet. Unë jam tmerruar kur kam shkuar në këtë Fond dhe kam parë në oborr dy dyqane që merren me rekrutimin e pacientëve që i dërgojnë jashtë vendit”, ka thënë ai.
Ministri Latifi ka theksuar se dikasteri që udhëhiqet nga vetë ai, po punon në shumë rrugë që do ta transformojnë shëndetësinë e Kosovës.
“Në çështjet e legjislacionit kemi gjashtë ligje, 18 udhëzime apo nënligje të ndryshme, dhe për secilën nga to, është grupi punues duke punuar, është plani i veprimit, është data e pritjes se kur do të përfundojë, i kemi pikat e avancimit të projektit për secilën nga to”, ka thënë Latifi.
Po ashtu, ai ka potencuar se çështja më e rëndësishme në shëndetësi është kujdesi parësor.
Ai ka thënë se nëse nuk rregullohet legjislacioni dhe mirëqenia e punëtorëve shëndetësor nuk mund të ketë suksese në shëndetësi.
“Po merremi me mirëqenien e mjekëve, punëtorëve shëndetësorë, nëse nuk e rregullojmë mirëqenien e tyre, ata hargjohen, mërziten e dëshprohen dhe nuk mund të kemi suksese të mëdha në shëndetësi”.
Latifi ka përmendur edhe infrastrukturën e spitaleve.
“Një element tjetër është bashkëpunimi ndërkombëtar. Neve po ashtu na duhet të fillojmë procesin e akreditimit të spitaleve, shërbimeve, ëprgjegjësitë e klinikave të ndryshme. Në të njëjtën kohë paralelisht po punojmë në përmirësimin e infrastrukturës”, shtoi ai.
“E kemi obligim njerëzor e moral që të merremi me shëndetësinë e ta bëjmë prioritet. Në qendër të vëmendjes e kemi pacientin, zhvillimet teknologjike, zhvillimin e evidencës në të cilat marrim vendime dhe këto besoj që do të ngritin kualitetin e shërbimeve shëndetësore dhe do ta përmirësojnë dukshëm shëndetësinë”, ka përfunduar Latifi.