Presidentja e Kosovës, Vjosa Osmani, të mërkurën, ka pritur në takim ministrin e Jashtëm të Greqisë, Nikos Dendias.
Presidentja Osmani ka theksuar se Kosova dhe Greqia ndajnë të njëjtat vlera euroatlantike, ndaj ka kërkuar mbështetjen greke për anëtarësim në Këshillin e Evropës,(KiE), Partneritetin për Paqe dhe NATO, si një garanci jo vetëm për shtetin e Kosovës, por edhe për rajonin.
E para e vendit, ndër të tjera ka përmendur rrezikun nga tendencat destabilizuese të Rusisë në Kosovë, Bosnjë e Hercegovinë dhe Mal të Zi, nëpërmjet Serbisë si satelit i saj.
Sipas njoftimit të Presidencës, një pjesë e takimit i është kushtuar zhvillimeve të krijuara pas agresionit të Rusisë në Ukrainë.
Presidentja Osmani ka përsëritur qëndrimin se Kosova është plotësisht në linjë me sanksionet e BE-së dhe ShBA-së ndaj Rusisë, duke shprehur mbështetje për popullin ukrainas.
Ajo ka theksuar se tashmë Kosova ka strehuar një grup të gazetarëve nga ky shtet, sikurse që është e hapur edhe për strehimin e refugjatëve të tjerë.
Në takim me ministrin Dendias, Osmani ka shprehur gatishmërinë e thellimit të bashkëpunimit të mëtejmë, me shpresën që së shpejti do të formalizohet vendimi për njohjen e pavarësisë së Republikës së Kosovës nga Greqia.
Gjithashtu në këtë takim me ministrin Dendias, Presidentja Osmani ka potencuar edhe nevojën për rritjen e shkëmbimit tregtar e ekonomik, si dhe bashkëpunimin në politikën e jashtme, turizëm, kulturë si dhe sfera të tjera të interesit të dyanshëm.
Ndryshe, Ministri i Punëve të Jashtme të Greqisë, Nikos Dendias do të qëndrojë të mërkurën e tetë qershorit për vizitë në Kosovë.
Gjatë qëndrimit të tij në Prishtinë, Ministri i Punëve të Jashtme të Greqisë pritet të ketë një takim të përbashkët me përfaqësuesit e Bashkësisë Ndërkombëtare në Prishtinë (UNMIK, Këshilli i Evropës, OSBE, EULEX, Zyra e BE/EUSR, KFOR-i dhe ambasadorët nga vendet e Quintit, përkatësisht Franca, Gjermania, MB, SHBA dhe Italia.
Sipas njoftimit të Ministrisë së Punëve të Jashtme të Greqisë, ministri Dendias do të zhvillojë një takim kokë më kokë me kryeministrin Albin Kurti dhe më pas do të ketë edhe një darkë.
Diskutimet që priten të jenë në qendër gjatë vizitës janë ato të bashkëpunimit ndërmjet Athinës dhe Prishtinës në fusha të ndryshme, si në ekonomi, energji, kulturë, shkencë, shëndetësi, arsim dhe turizëm.
“Gjithashtu, në agjendën e bisedimeve do të jetë edhe perspektiva evropiane e Ballkanit Perëndimor dhe zhvillimet në lidhje me dialogun Beograd-Prishtinë”, thuhet në njoftim.
Gjithashtu ministri, Dendias kishte vizituar Prishtinën në tetor të vitit 2020 dhe së fundmi, në qershor të vitit të kaluar.