Gjendet në një zonë jo fort të banuar por mjaft të frekuentuar nga vozitësit.
Kjo zonë në fshatin Trudë shërben si deponi ilegale e mbeturinave që hedhen nga qytetarët. Njësoj po shërben edhe kjo zonë në Shkabaj.
Ndonëse pastrimi i tyre është përgjegjësi që i takon komunës, atë ka vendosur ta marrë organizata “Let’s Do It-Ta pastrojmë Kosovën”.
Por, pavarësisht interesimit, ata thonë se këtë po e pengon komuna ngase në të njëjtën, ka hasur në vesh të shurdhër.
“Do provojmë të sigurojmë fonde shtesë ashtu që ato lokacione të pastrohen mirëpo, duhet të dime se sa vështirë është të sigurohen ato fonde për pastrimin e deponive. Pastrimi me 50 përqind nga ana jonë do bë do bëhej nëse komuna e Prishtinës zotohet ta paguaj pjesën tjetër”, ka thënë Luan Hasanaj nga “Let’s Do It-Ta pastrojmë Kosovën”.
Por nga Komuna, thonë se kanë të tjera parime.
“Ideja jonë është që paraprakisht, para se ta likuidojmë një deponi ilegale të krijuar, ti krijojmë garancat tona që e njëjta të mos kthehet në deponi. Kështu që ne kemi krijuar mbështetje prej inspektoriatit, prej banorve që banojnë dhe kemi pa mundësit për tu mos kthyr prap në deponi”, ka deklaruar Bekim Brestovci, Drejtor i Shërbimeve Publike në Komunën e Prishtinës.
Megjithatë, nga e njëjta nuk kanë tendencë të refuzojnë bashkëpunimin.
“M’është thënë dje që ka ardh një kërkesë, nuk e kam pas në tavolinën time por besoj që nesër më së voni. Do e shohim por qëllimi është të krijojmë një koncept që jo vetëm si t’I largojmë por si t’i parandalojmë krijimin e këtyre hapsirave”, është shprehur Brestovci.
Deponitë ilegale në këto zona kanë vite ekzistimi e për të njëjtat, nga komuna nuk është dhënë afat për largimin e tyre.