Një protestë masive ishte paralajmëruar në Serbi afër pikave kufitare me Kosovën për mesditën e së shtunës.
Madje, në rrjete sociale ishte bërë thirrje edhe për djegie të pikave kufitare.
Por protestuesit në Jarinjë, që ishin jo më shumë se rreth 20 persona, nuk u lejuan t’i afrohen kufirit, derisa u mbajtën në një distancë mbi 1 kilometërshe.
Kjo protestë ishte thirrur kinse më mbrojtje të Kosovës që protestuesit e konsideruan si tokë të Serbisë.
E gjithë dita shkoi qetë dhe pa incidente.
“Policia i ka marrë masat e veta, si çdoherë në mënyrë që situata të jetë e qetë dhe të mos eskalojë. Nuk kemi pasur ndonjë problem për ta theksuar. Rruga është e hapur, nuk kemi ndonjë problem në atë pikë kufitare. Veriu është i qetë, nuk kemi ndonjë problem sa i përket aspektit të sigurisë”, ka thënë zv.drejtori i Policisë për rajonin e veriut, Veton Elshani.
Pos Policisë së Kosovës për monitorim të situatës në pikat kufitare me Serbinë, sidomos në veri, kanë qenë edhe EULEX-i dhe KFOR-i, që sot janë parë në numër më të madh gjatë ditës.
Protesta ishte thirrur për në ora 12:44, duke ndërlidhur orën si simbolikë me rezolutën e OKB-së për Kosovën.
Pikërisht për shkak të këtij lajmërimi, Qendra për Menaxhimin e Kufirit u ka bërë thirrje kosovarëve të premte që t’i shmangin kalimet kufitare me Serbinë, ndërsa pas protestës njoftoi se qarkullimi është normalizuar.