Njëri nga personat e dyshuar për tentim vrasje në Prizren tashmë është arrestuar, kështu ka njoftuar Policia e Kosovës.
“Njësiti i hetimeve të sektorit rajonal DRP Prizren me datën 27.05.2024 ka arritur që të lokalizoj dhe arrestoj të dyshuarin A. L (viti i lindjes 1957, mashkull kosovar shqiptar)”, thuhet në njoftimin e PK-së.
Sipas njoftimit, i dyshuari në prani të avokatit mbrojtës është intervistuar.
Në lidhje me këtë është informuar prokurori i rasti, i cili ka lëshuar aktvendim për ndalim të të dyshuarit për 48 orë.
Ndërsa, rasti mbetet nën hetime.
Policia kërkon ndihmën e qytetarëve për kapjen e gjashtë të dyshuarve për tentim vrasjen në Prizren
Policia e Kosovës të hënën kishte shpallur në kërkim gjashtë të dyshuar për tentim vrasje në Prizren, duke kërkuar ndihmën e qytetarëve për kapjen e tyre.
Sipas njoftimit të Policisë së Kosovës, personat e dyshuar të shpallur në kërkim janë, Abedin Zenel Likaj, Hajdin Zenel Likaj, Shaqir Zenel Likaj, Zenel Abedin Likaj, Isuf Shaqir Likaj, dhe Hajdar Abedin Likaj, të gjashtit nga fshati Krajk i Komunës së Prizrenit.
Po ashtu, në njoftim thuhet se personat kërkohen për veprën penale “Vrasje e rëndë në tentativë”, “Lëndim i rëndë trupor“, “Mbajtje në pronësi, kontroll apo posedim të paautorizuar të armëve” dhe” Pjesëmarrje në rrahje ” e cila ka ndodhur më 22 maj në fshatin Krajk – Gjonaj të Prizrenit.